MWEWE

UPIGAJI PICHA FILAMU YANGU IITWAYO "NISAMEHENI WAZAZI"

2010-05-16T21:12:00.000-07:00

Picha hizi zote zinaonyesha jinsi upigaji picha wa filamu hii ulivyofanyika. Ni filamu ambayo inalenga kuwahamasisha wananchi dhidi ya athari za utumiaji wa madawa ya kulevya. Ni filamu ambayo iliandikwa na Bw.KAZUNGU SAMUEL.Kazungu ambaye ni mwana blog-pia ni mwandishi katika gazeti la kiswahili la Taifa Leo. Wengi wanatarajiwa kuelimishwa na filamu hii ya aina yake kuwahi kuchezwa jijini Mombasa hapa Kenya.

JAA LA TAKA MWAKIRUNGE:MUNGU TU NDIYE ANAYELINDA WANAOISHI HAPA

2009-08-17T23:01:00.000-07:00

Ukifika jaa la taka la Mwakirunge,utakutana na watu wanaoishi kwa taabu ya kuchokora uchafu ndani ya jaa hili.

Lakini kutokana na hali ngumu za maisha nchini Kenya na kuzidi kudorora kwa uchumi wa dunia,watu hawa ndani ya jaa hawana tumaini lolote la kufanikiwa na kile kilichobaki na kuvumilia uvundo na harufu mbaya kuendelea kuishi.

Nilikuwa huko na kunasa baadhi ya picha hizi.Tazama ufanye maamuzi.

SHIDA YA MAJI IMEKUWA DONDA SUGU HUKU KILIFI MKOANI PWANI

2009-08-17T22:49:00.000-07:00

Unapopita katika maeneo mengi ya mashambani wilayani Kilifi ni kawaida kuwaona akina mama na watoto wakitembea mwendo mrefu kutafuta maji.

Hali hii imezidishwa na kiangazi cha muda mrefu katika eneo hili ambalo linapakana na mbuga ya wanyama ya Tsavo Mashariki.

Nilipofika huko majuzi,nilikumbana na akina mama wakichimba bwawa ili kutega maji wakati mvua itakaponyesha.Lakini hii pia sio kazi rahisi kama picha hizi zinavyoonyesha.Matatizo kweli ni mengi vijijini.

Tunaweza kuwasaidia wakazi hawa kivipi.

NJAA INAVYOWASUMBUA WAKAZI HUKO KILIFI MKOANI PWANI.

2009-08-17T22:25:00.000-07:00

Hivi majuzi nilizuru maeneo ya mashambani mwa wilaya ya Kilifi katika mkoa wa pwani na kile nilichokumbana nacho kilikuwa dhahiri.Hali hali ya maisha ya wakazi wengi huku inatia hofu kutokana na baa la njaa.

Ingawa serikali inajaribu kuwasaidia kwa kutuma chakula cha msaada,hali haijakuwa na afyeni hivi kwamba wakazi wengi bado wanakodolea macho kifo kutokana na baa hili la njaa.

Kulingana na mahojiano niliyofanya,wengi hawajavuna chochote katika mashamba yao kwa zaidi ya miaka kumi iliyopita.Na sasa wanataka serikali iwasaidie hata zaidi.

Mwaka wa 2005,taasisi ya kukadiria hali ya umaskini nchini ilizindua ripoti yake ambayo ilionyesha kuwa eneo la Ganze ndilo lenye kiwango kikubwa cha ukata na umaskini uliokithiri.

Tafadhali saidieni wakazi hawa nao wawe na angaa tone la furaha maishani mwao.Picha zinaonyesha hali ilivyokuwa wakati wa kugawanywa kwa chakula hicho cha msaada katika shule ya msingi ya Mnagoni wilayani Bamba.

Kazungu.

JUHUDI ZA KUTUNZA MAZINGIRA KATIKA MAENEO KAME NCHINI KENYA.

2009-08-04T22:09:00.000-07:00

JUHUDI ZA KUTUNZA MAZINGIRA KATIKA MAENEO KAME.

(Badala ya kuchoma makaa,sasa wakazi washauriwa wafuge kanga na kuuza)

Hivi majuzi,waziri wa mazingira Bw.John Michuki alitangaza mikakati mipya ya kutunza mazingira hasa katika juhudi za uboreshaji wa misitu ya humu nchini ambayo katika siku za hivi karibuni imekuwa walengwa wakuu katika uharibifu wa mazingira unaoendelea katika kima cha kutisha.

Na huku mgogoro kuhusu ukataji miti na shughuli za kilimo ukiendelea kutoa tumbo joto katika msitu wa Mau huko Riftvalley,kampeini za aina yake za kutunza mazingira kwa hivi sasa pia zimeanzishwa katika maeneo kame.

Na kama vile Taifa Leo ilivyogundua ilipokuwa katika eneo la Bachuma Gate huko Voi hivi majuzi,sasa juhudi za kutunza mazingira zimeingiliwa na wakazi wanaotaka kuhakikisha kwamba misitu inalindwa.

Waziri Michuki akiongea hivi majuzi alisema wizara inatayarisha sera ambapo kila mkulima atatikana kutumia asilimia kumi ya shamba lake katika upanzi wa miti.Hii waziri alisema itasaidia pakubwa katika kuhakikisha Kenya inabakia kuwa na mazingira mema baada ya kuona athari za kukatwa kwa msitu wa Mau zikianza kuathiri wakenya.

Katika eneo la Bachuma,Mzee Gerald Macharia mtaalam wa mazingira katika maeneo kame pamoja na Joseph Mburu wameanzisha maradi wa aina yake ambao watarajia kuwa utapunguza kwa kiasi kikubwa shughuli za uchomaji makaa na ukataji kuni katika maeneo haya ambayo ni kame na hupata mvua chache kwa mwaka.

Katika maeneo haya ambayo yanapakana na Samburu,Makina na Maungu,shughuli za ukataji miti zimekuwa zikiendelea kwa kiwango cha kutisha na kutoa taaswira ya kuendelea kwa jangwa katika maeneo haya.

Ni kawaida mtu anapopita katika maeneo haya hasa anaposafiri kwenye barabara kuu itokayo Nairobi kuelekea Mombasa ataona wauzaji makaa kando mwa barabara wakinadi bidhaa hiyo.

Lakini kulingana na Mabw.Macharia na Joseph Mburu,wao wameanzisha kampeini za kuhakikisha kuwa wakazi wanaacha kabisa masuala ya kukata miti na kuchoma makaa badala yake wanawafunza jinsi ya kufuga kanga na kuuzia watalii katika eneo hilo.

Huku wakishirikiana sako kwa bako na shirika la hifadhi ya wanyama pori nchini(KWS) Bw.Mburu na Bw.Macharia wamekuwa wakiingia kutoka kijiji kimoja hadi chengine kuwaelimisha wakazi juu ya mpango huu.”Badala ya wao kukata misitu na kuharibu mazingira,sisi tumeanzisha kampeini za kuwahimiza wafuge kanga na kuwauza kwa watalii na mahoteli katika miji ya Nairobi na Mombasa ambapo wanaweza kupata fedha nyingi na wakaendeleza maisha yao,” akasema Bw.Mburu.

Wakiongea na Taifa Leo katika eneo ambalo wanafugia kanga wengi katika kituo kidogo cha biashara cha Bachuma,mkabala na hoteli ya Tsavo Mashariki,wawili hao walisema kampeini yao imeanza kuzaa matunda kwani baadhi ya wakazi wameanza kuingia mradi huu na pole pole wameamua kuacha kuchoma makaa na wanafuga ndege hawa kwa wingi na kujipatia pato la kila siku.

Katika kituo chao ambacho kimesajiliwa na kutambuliwa na shirika la kuhifadhi wanyama pori(KWS),Macharia na Bw.Mburu wamekuwa wakifuga kanga wengi pamoja na wanyama wengine wa mwitu kama vile sungura.

Katika maeneo kame,maisha huwa ya taabu kwani bayana njaa huonekana kuandama wakazi kila mara.Na kwa kutafuta pesa za haraka,wakazi hukata miti na kuchoma makaa na kuuza kuni katika harakati za kujipatia riziki.

Hiyo ndiyo changamoto ambayo Macharia na Bw.Mburu waliangalia kwa makini na kuona kuwa njia mbadala ya kuhifadhi miti michache iliyopo katika maeneo haya ni kupitia kwa mpango huu.

“Katika nyakati za kwanza hali ilikuwa ngumu na watu wengi walichukulia kimzaha mwito huu lakini walivyoona wanaweza kufuga kanga na kuuza na kupata pesa,sasa wakaamua kujaribu na wengine tayari wameanza kuuza ndege hawa katika hoteli zilizoko katika barabara kuu ya Nairobi-Mombasa.

Wakati Taifa Leo ikiwasili katika mradi huo wa Game Rescue Foundation,Bw.Mburu na Mzee Macharia walikuwa wamewasili muda mchache kutoka Taru ambapo walikuwa na warsha ya siku moja kuwaelezea wakazi kuhusu mradi huu ambao pindi ukishika kasi,biashara ya makaa na uharibifu mwengine wa misitu itapungua au kumalizika kabisa.

Miezi miwili iliyopita,Bw.Mburu na Macharia walikuwa katika eneo la Maji ya Chumvi ambapo walikuwa na warsha nyengine ya kuwahamisha wakazi waache kuchoma makaa lakini badala yake waanze kufunga kanga ili wauze na kupata mapato.

“Tunafahamu kuwa hali ya maisha katika maeneo kame daima imekuwa ngumu lakini pia tumewaeleza wakazi juu ya mchango mkubwa ambao wanatakikana wawe nao katika kufanikisha mazingira yao,” akasema Bw.Mburu.

Kwenye kituo chao(Sanctuary) wamekuwa wakifuga aina mbili za kanga wajulikanao kama Helmeted guinea fowl na vultureline guinea fowl.”Hawa ndio wanaopatikana katika maeneo kama kama haya lakini kuna ile aina ya kanga aitwaye christened guinea fowl ambaye hupatikana tu katika maeneo yenye misitu mikubwa na baridi kali.

Kulingana na kifungu 376 cha sheria za kuhifadhi na kusimamia wanyama wa pori,kanga wanaruhusiwa kunaswa katika msimu unaoanzia mwezi wa machi hadi mwezi wa novemba.Miezi ambayo KWS inapiga marufuku unasaji wa kanga ni kuanzia mwezi wa desemba hadi feburari.

Kulingana na Bw.Mburu,mradi huu huenda ukawa na faida kubwa kwa wakazi wa Bachuma na viunga vyake kwani mbali na kuwa wakazi sasa wanaanza kupata ajira,hapa sasa kutatumika kama kituo ambapo habari muhimu kuhusu wanyama pori zinaweza kupatikana hasa kwa wasomi na wanasayansi.

“Hiki ni kituo ambacho tunataka kiwe kielelezo kuwa hata katika maeneo kame kama haya juhudi za kuhakikisha mazingira bora na maisha mema zinaweza kuafikiwa,” akasema Mzee Macharia.Kwa sasa wao wana takribani kanga 60 ambao wanafuga na juzi walipata oda inayowahitaji kusafirisha kanga 300 hadi nchini China.

Kutokana na eneo hili kupata mvua chache sana kwa mwaka,wakazi wengi huwa wafugaji ingawa wamekuwa wakikabiliwa na changamoto nyingi ikiwemo njaa isiyo na kikomo.Hali hiyo huwafanya wengi wao kubakia kula matunda ya mwitu kila msimu.

Akiongea na Taifa Leo katika eneo la Makina,mmoja wa wakazi ambao waliamua kuacha kuchoma makaa na badala yake ameanza kufuga kanga Bw.Joseph Mwero alisema anatarajia kuanza maisha mapya katika biashara hii ya kufuga kanga.

”Kwanza biashara yenyewe ilikuwa imeingiliwa na watu wengi hivi kwamba ilikuwa hata kuuza gunia moja la makaa ni tatizo;Lakini tulipoenda kwa semina hii huko Taru,niliamua sitokata tena makaa na badala yake nitajitahidi kufuga ndege hawa kama njia badala ya kuendeleza maisha yangu,” akasema.

Maoni yake yalikuwa sawia na yale ya Justine Mkalla ambaye tulikumbana naye katika eneo la Maji ya Chumvi tukirudi jijini Mombasa.Yeye pia aliniambia kwamba ameamua kuacha mambo ya kuchoma makaa na badala yake ameamua kuanza kufuga ndege hao ili apate kuwauza na kuendeleza maisha yake.

Wakati Taifa Leo ikiondoka katika eneo hilo,sura ya matumaini ilikuwa bayana kwani sasa wakazi wameona mwanga na wanaapa kushirikiana na KWS pamoja na mpango huu ili kuhakikisha pia nao wanapata vibali na kufunga ndege hao ambao huwa na soko kubwa nchini na kimataifa.

MWAMBAO SANAA GROUP KUTOA FILAMU MWEZI HUU

2009-08-04T21:52:00.000-07:00

Wasanii wa maigizo kutoka kikundi cha Mwambao Sanaa Group wanatarajiwa kutoa filamu ya kiswahili ambayo inatarajiwa kuwa na ubora wa filamu za kiswahili Afrika Mashariki na Kati.

Filamu hiyo ambayo inajulikana kama DENI ilitungwa na kuelekezwa na mwandishi maarufu wa makala jijini Mombasa Bw.Kazungu Samuel.

Upigaji picha wa filamu hiyo ulifanywa na Justine Katana wa kampuni ya CK Production iliyoko viungani mwa jiji la Mombasa katika mtaa wa Mgongeni-Mwandoni.

Kikundi cha Mwambao Sanaa Group kinapatikana katika eneo la Steji ya Paka huko Bamburi.

Kwenye picha hapo juu,afisa wa uhusiano mwema wa kikundi hicho cha wasanii Bi.Salma Abdalla anaonekana akimpa cheti mwenyekiti wa kikundi hicho Bw.Ludovick Mbogholi pindi tu alipokipata cheti hicho.

Mpiga Picha:Kazungu Samuel

Mwakere asitingisike awe imara

2008-08-11T22:12:00.000-07:00

Namuomba waziri Ali chirau Mwakere asibabaike bali awe imara kwani wabunge wenzake wanamuunga mkono.Ukweli ni kwamba viongozi hawa ambao wanasema kuwa bandari ya Mombasa iongozwe na afisa wa kitaifa badala ya mpwani ndio wale wale ambao walisema wanataka mkoa huu wa pwani ujiendeleze na hata wakatoa ajenda nyingi tu ikiwemo suala la Majimbo.Ni jambo la kushangaza kuwa hawakuwa na utaifa huu ambao sasa unajitokeza.Hii ni changamoto kwa wabunge wa pwani kuwa wafanye juu chini na kuongea kwa sauti moja ili bandari hii ya Mombasa ibaki katika himaya ya pwani.

Mwanajeshi wakati wa mkoloni sasa anauza magazeti Shanzu.

2008-08-03T21:58:00.000-07:00

Mzee Mwasi akinieleza kuhusu jinsi alivyokuwa mwanajeshi wakati wa utawala wa ukoloni na pia naibu wa chifu katika eneo la Mbale katika tarafa ya Wundanyi huko Taita.Pia alikuwa rafiki wa karibu wa marehemu Ronald Gideon Ngala ambaye alikuwa mwanasiasi maarufu katika mkoa huu wa pwani.Pia alikuwa rafiki wa aliyekuwa mbunge wa eneo la Kisauni hapa jijini Mombasa Emanuel Karisa Maitha.Mzee huyu ambaye sasa ana miaka 70 bado ana nguvu za kuuza magazeti katika kitongoji cha Shanzu kwenye barabara kuu ya Mombasa-Malindi.

Ni saa kumi na mbili asubuhi na kituo cha biashara cha Shanzu kimeanza kuwa na utiriri wa shughuli za kuanza siku.Ni jumatatu iliyo na umande kutokana na kijibaridi cha asubuhi.Huu ni msimu wa baridi kali hapa pwani.

Hata hivyo miongoni mwa wakazi hawa wa Shanzu ambao wanaparamia matatu kuelekea katikati mwa jiji kwa shughuli za kikazi,mzee mmoja anaonekana akiuza magazeti katika kioski kilichoko karibu na steji ya pikipiki za bodaboda.

Si rahisi kufahamu chochote kumhusu mzee huyu ambaye anaonekana tuli akiwangoja wateja wafike kibandani mwake kununua magazeti.Lakini uchu wangu wa kutaka kumfahamu mzee huyu unazindua hazina ndefu ya historia iliyojificha kwake.

Sio rahisi kuamini kuwa muuzaji huyu wa magazeti ya Taifa Leo alikuwa wakati fulani mwanajeshi wakati wa utawala wa mkoloni.Fauka ya hayo alikuwa chifu mdogo kabla ya kuwa meneja wa chama kimoja cha ushirika katika sehemu ya Mbale huko Taita.Ni mzee ambaye mazungumzo naye yanakufikisha katika historia ya watu maarufu waliowahi kutawala katika fikra za kizazi cha wapwani miongo iliyopita.

Hata hivyo mbali na historia hii ndefu,Mzee Duncan Julius Mwasi ambaye alizaliwa mwaka wa 1938 katika eneo la Mbale katika tarafa ya Wundanyi alianza kuuza magazeti ya Taifa Leo katika kituo hiki cha biashara mwaka wa 1979.

”Wakati huo kulikuwa na kibanda kimoja pekee katika eneo zima la Shanzu huku sehemu kubwa ikitawaliwa na magugu kando mwa barabara hii.” Akaanza masimulizi yetu katika kibanda chake.

Huku akionekana kufahamu vyema masuala ya biashara hii ya magazeti,Mzee Mwasi alinidokezea kwamba wakati akianza kuuza magazeti haya,bei ya Taifa Leo ilikuwa ni Shilingi moja na senti ishirini pekee(1/20) huku gazeti la Daily Nation likiuzwa wakati huo kwa Shilingi tatu huku lile la Sunday Nation likiuzwa kwa shilingi nne na sumni(4.50).

“Wakati huo kulikuwa hakuna wauzaji wengi wa magazeti lakini kwa sasa vijana pia wameingilia kazi hii katika harakati za kujisukuma kimaisha.” Akasema.

Ni katika mazungumzo yetu ambapo mzee Mwasi alinidokezea kuwa alikuwa rafiki wa dhati wa aliyekuwa mwanasiasa mashuhuri wa pwani miaka ya sitini marehemu Ronald Gideon Ngala.Urafiki wao ulikuwa mkubwa hivi kwamba mara kwa mara mzee Mwasi alikuwa akilala katika nyumba ya Ngala iliyoko katika mtaa wa Buxton.

“Nikiwa pamoja na marehemu Ngala,mwanawe Noah Katana Ngala ambaye baadaye alichaguliwa kuwa mbunge wa Ganze alikuwa ni mtoto mdogo pamoja na nduguze wengine.

Mara kwa mara marehemu Ngala alizoea pia kutembelea eneo la Mbale,kijijini kwa mzee Mwasi na kujenga himaya kubwa ya urafiki kati ya familia ya Ngala na ile ya Mzee Mwasi.

Awali mzee huyu alinidokezea kuwa alikuwa mwanajeshi katika serikali ya ukoloni lakini punde tu baada ya Kenya kupata uhuru,mzee Mwasi aliondoka jeshini na kuajiriwa kama naibu wa chifu katika eneo la Mbale.”Nilifurahia mno kuwahudumia wakazi wa Mbale hasa ikikumbukwa kuwa mimi ni mzaliwa wa eneo hilo.” Akasema.

Hata hivyo baada ya kuhudumu kama naibu wa chifu kwa muda mrefu,mzee Mwasi aliamua kujiondoa katika utumishi wa umma na kuzingatia kilimo cha machungwa na mboga katika eneo hilo la Mbale.

Kutokana na ukakamavu wake kibiashara,mzee huyu alichaguliwa kuwa meneja katika chama cha ukuzaji mboga na matunda cha Mbale ambako alihudumu hadi mwaka wa 1979 alipoamua kujiondoa chamani na kuamua kuuza magazeti katika kijiji cha Shanzu.

“Watu walikuwa wakinitaka sana katika chama hicho kutokana na bidii niliyokuwa nayo lakini muda ukafika ambapo niliamua kuacha kazi hiyo kutokana na biashara mbaya iliyosababishwa na ukosefu wa biashara na ushindani uliokithiri.” Akasema

Aliamua kuja katika kijiji cha Shanzu kuanza maisha upya huku akiamua sasa kuuza magazeti.Hata hivyo kutokana na uchache wa wakazi wakati huo,magazeti yote yaliyonuia kuuzwa katika kijiji cha shanzu yaliteremshwa katika jela kuu la Shimo La Tewa na Mzee huyu alikuwa akiyafutata huko.”Nilikuwa nikienda katika jela la Shimo La Tewa ambako magazeti yalikuwa yakishukishwa kabla ya kuyaleta katika eneo la Shanzu.”

Akiwa muuzaji wa magazeti,aliwahi kujenga nyumba na kuwasomesha wanawe kutokana na kazi hii.Mbali na hayo pia aliwahi kuwa karibu na aliyekuwa mbunge wa Kisauni marehemu Karisa Maitha ambaye licha ya kuwa waziri alikuwa akifika kibandani kwake na kupiga gumzo.”Maitha alikuwa ni kama kijana wangu kwa vile alikuwa akija hapa mara kwa mara na kupiga gumzo licha ya kuwa alikuwa waziri katika serikali ya NARC.”

Kabla ya ushindani wa kuuza magazeti kujiri kijijini hapa,Mzee Mwasi alikuwa akiuza magazeti yake katika taasisi mbalimbali kama vile chuo cha walimu cha shanzu,hoteli maarufu ya Serena,jela LA Shimo la Tewa,shule ya msingi ya Shimo la Tewa na hoteli ya Dolphin.

Hadi nikiondoka katika kibanda chake,nilipata taaswira tofauti kumhusu mzee Mwasi na kile kilichojitokeza katika mahojiano naye ni kudhihirika kuwa mzee huyu bado ana bidii ya mchwa na niliondoka huku yeye akisema kuwa bado ataendelea kuuza magazeti haya ya Taifa Leo.

KIKUNDI KINACHOTETEA WANAOUGUA UKIMWI

2008-07-24T22:12:00.000-07:00

KIKUNDI KINACHOTETEA DHULUMA ZA WANAOUGUA UKIMWI

Madhila ambayo anayapitia mtu aliye na virusi vya HIV ambavyo vinasababisha ugonjwa wa Ukimwi bado ni mengi mno.Ingawa kumekuwa na kampeini kali za kuwahamasisha watu na kuwapa ufahamu ili wasiwatenge watu wanaougua ugonjwa huu,yamkini juhudi hizi zimekuwa bure bilashi huku jamii ikizama katika lindi zito la kupuuza athari anazopata mtu anayeugua ugonjwa huu.

Hivi majuzi mahakama moja jijini Nairobi ilitoa uamuzi wa kihistoria pale ilipomtaka mfanyikazi mmoja ambaye alipimwa virusi bila hiari yake na hatimaye kufutwa kazi na muajiri wake kulipwa kwa dhuluma aliyofanyiwa.

Uamuzi huu ulipokolewa vyema na Wakenya ambao wamekuwa wakiendeleza kampeni za kuwalinda vyema na kuwachukulia wagonjwa wa ukimwi kama watu ambao mchango wao katika jamii bado unahitajika sana.

Na juhudi hizi hazijaishia tu kwa mashirika au makundi makubwa ya haki za kibinadamu,vijijini ujumbe huu umekuwa ukiendelezwa bayana huku watu wakitakiwa kutowabagua wale wenye virusi katika jamii.Kwa sababu ya kutokuwa na sheria mwafaka ambazo zingelifaaa kuwalinda wale wanaopatikana na virusi hivi vya Ukimwi,baadhi yao hubaki wakiachishwa kazi na wengine hata kufungiwa majumbani,mbali na majuto tele ambayo wanayapitia kimya kimya.

Lakini kikundi kimoja katika lokesheni ya Matsangoni kimeamua kuweka bayana kampeini zake kuhusu madhila ambayo wanaopitia wale wote wenye virusi vya ukimwi.Kikundi hiki kilikuwa mojawapo ya vikundi ambavyo viliigiza kwa ustadi katika mchezo wao uitwao ukimwi katika shule ya msingi ya Matsangoni.

Kwenye mchezo huo ambao uliwaacha wengi wakiwa wameduwaa kutokana na usanifu wa hali ya juu,kijana Faraj(Fiesta Lewa) anampenda msichana kwa jina Pendo(Santa Julius) na wote wanapeleka habari hizo kwa wazazi wao.Wazazi wa Pendo,Victor Gari Mwanyonyo na Magret Nyamvula wanamtaka binti yao amlazimishe mpenzi wake Faraja waende wakapimwe HIV kabla ya ndoa yao.

Hilo pia linafanyika katika nyumba ya akina Faraj ambao wazazi wake(Janet Tido na Kelvin Deche) wanataka pia kijana wao na mpenziwe wakapimwe ili wajue hali zao za kiafya.Pindi tu wanapopimwa,Pendo anapatikana hana virusi lakini kiosha roho wake(Faraj) anajipata kaathirika na ugonjwa.

Hapo kasheshe inaanza kutawala huku wazazi wa pande zote mbili wakikorogana vikali wakitaka ndoa hiyo isifanyike.Baya zaidi bosi wa Faraj kule akaofanyia kazi(Rodgers WAgure anapata habari kuwa Faraj ana ukimwi na bila kusita anaamua kumfuta kazi.Hili pia linaathiri uhusiano wa bosi na binti yake(Priska Mapenzi) ambaye anahoji ni kwanini babake akamfuta kazi Faraj.Mzozo unakuwa mkubwa hivi kwamba anahitajika mshauri wa pande zote mbili pamoja na bosi huyo.Hapa anafika Mjomba Agustus ambaye kwa juhudi kubwa anaamua kutoa ushauri na hali inabadilika kabisa.Familia zote mbili zinaamua kuwa lazima Faraj apewe matumaini na kwamba kupata ukimwi sio mwisho wa maisha na kwamba bado anaweza kuendeleza na mipango yake ya baadaye.

Hilo linafanyika na amani kote huku wakiwa mbele ya jukwaa la wageni wanaamua kushikana mikono na kwa hilo umati akiwemo mkuu wa wilaya ya Kilifi na DO wa Bahari Florence Sitawa unaachwa ukiwa na furaha.

Baadaye Taifa Leo iliweza kuongea na msemaji wa kikundi hiki Bw.Victor Gari ambaye alisema kikundi cha Tabasamu Youth Association kinajishughulisha na kuelimisha wanakijiji kuhusu masuala mbalimbali ya ufahamu ambayo ni ndara kufika vijijini.”Sisi huwa pia ni washauri rika na hutumia muda mwingi kufika vijijini na kutoa ushauri kuhusu elimu ya kijamii,vita dhidi ya ugonjwa wa ukimwi na pia kuhusu mamba za mapema na kikwazo chake katika maisha ya kila siku.” Akasema.

Naye mwelekezi wa mchezo huo,Fiesta Lewa ambaye anacheza kama Faraj alieleza matumaini yake kuwa angaa wamefanikiwa kugeuza hali ya maisha ya watu wa Matsangoni kwa kutoa ushauri kuhusu masuala mbalimbali ya elimu ya kijamii.”Unakuta kwamba mbali na michezo hii,sisi tumeona haja kubwa ya kuelimisha umma na hasa katika ndani vijijini ambapo elimu ya jamii imepuuzwa na kukosa mwelekeo hitajika.” Akasema.

Alisema kikundi hiki kina zaidi ya wanachama 25 na kwamba wao huwa na kila aina ya michezo inayoendana na mazingira ya halfa yenyewe.”Sisi kama kikundi cha kutumbuiza na kuelimisha huwa tuna hazina kubwa ya michezo,nyimbo na mashairi ambayo huwa tuko tayari kuyatoa kwa umma kutusikiliza kwa vile tunaamini nia katika mihadhara hii ambapo ujumbe huu unafika ndani kabisa kijijini.” Akasema Gari.

Kuhusu mchezo huu wao,GAri alisema waliutunga ili kuelezea kwa kina vile mtu mwenye ukimwi huteseka lakini pia vile jamii inaweza kugeuza hali ikiwa kutakuwa na ushirikiano mwema.”Hii ndio sanaa na ni moja ya kazi zetu za kuelimisha jamii.”akasema akiongea na Taifa Leo katika shule hiyo.

SHULE MAARUFU KWA NYIMBO ZA KITAMADUNI.

2008-07-24T22:01:00.000-07:00

Wanafunzi wa shule ya msingi ya Uyombo wakitumbuiza wageni katika shule ya msingi ya Matsangoni wilayani Kilifi.Shule hii ilikuwa bora miongoni mwa shule za wilaya ya Kilifi kutokana na uchezaji wake bora wa nyimbo za kienyeji.

SHULE MAARUFU KWA NYIMBO ZA KITAMADUNI: ILIKUWA YA PILI KATIKA MASHINDNAO YA WILAYA HUKO KILIFI: MKOA WA PWANI.

Ni shule ambayo imejificha sana katika lokesheni ya Matsangoni.Sio rahisi kuifikia kwa vile imejificha karibu kabisa na ufuo wa bahari kupakana na Watamu.Hii ndio shule ya msingi ya Uyombo ambayo wengi hawakufahamu ilikuwa na talanta nyingi katika michezo mbalimbali hadi hivi majuzi iliobuka ya pili katika mashindano ya ngazi ya kiwilaya ya nyimbo za kiasili na kwaya.

Mashindano hayo yalifanyika katika ukumbi wa shule ya viziwi ya Kibarani katika viunga vya mji wa Kilifi.Ni hapo ambapo wanafunzi wa kutoka shule hii walipodhihrisha jinsi walivyo na uwezo katika nyimbo za kiasili na kufanikiwa kuibuka wa pili kwa alama 86 nyuma ya shule ya msingi ya Kafuloni kutoka tarafa ya Vitengeni ambayo iliibuka nambari moja kwa alama 86.5.

“Mashindano yalikuwa magumu lakini tulijipanga na kila kitu kikawa bayana kwani ilidhihirika kuwa katika shule ya msingi ya Uyombo,talanta za uimbaji zitele ila ni muda tu kabla ya kuzikuza na kuzifanya kutambulika kitaifa na kimataifa.” akasema mwalimu wa kitengo hicho cha nyimbo za kiasili katika shule hiyo Bw.Mwang’ombe Kalama.

Kutokana na kuibuka nambari mbili katika tamasha hizo za nyimbo wilayani,sasa shule hiyo ya Uyombo ina nafasi ya kusonga mbele katika ngazi ya mashindano ya mkoa.Hata hivyo mwalimu huyo alisema kuwa bado kuna hali ya sintofahamu kuhusu kuendelea kwao na mashindano hayo ya ngazi za mkoa kwani ipo dalili kuwa mashindano hayo yanaendelea na wao hawakuweza kufika.

”Bado hatujajua kama tutaendelea mbele lakini tunangojea kama tutapata barua ya mwaliko kufika katika tamasha za kimkoa ambazi hufanyika jijini Mombasa kila mwaka.” Akasema mwalimu huyo akiongea

Na ilidhirika kuwa shule hiyo imekomaa wakati kikundi hicho cha nyimbo za kiasili kilipotoa burudani ya kuvutia ikitumbuiza katika hafla za kuwatuza wanafunzi waliofanya vyema katika lokesheni ya Matsangoni.

Hafla hiyo ambayo ilihudhuriwa na mkuu wa wilaya ya Kilifi Bw.John Elungata pamoja na mkurugenzi wa elimu wilayani Dickson Ole Keis.Pindi tu kikundi hicho kilipokuwa kikiongoa katika wimbo wake kuhusu mada muhimu ya ugonjwa wa ukimwi.

Katika wimbo wao ambao ulijaa hisia kali,waliimba na kujitupa huku na kule na kwa vile walikuwa wamejichana kwa aina mbalimbali ya mavazi ya kiasili basi ilikuwa rahisi kwa umati hasa viongozi waliokuwepo kujumuika nao na kuaza kucheza na kutoa burudani la aina yake.

Baadaye akiongea na Taifa Leo,mwalimu wa kikundi hicho Bw.Mwangombe alisema kuwa alikianzisha mwanzoni mwa mwaka huu katika shule hiyo ya Uyombo na tayari wamekuwa wakutumbuiza katika hafla mbalimbali katika sehemu hiyo.”Ni mwaka huu ndipo nikishirikiana na bodi ya elimu katika shule ya msingi ya Uyombo ndipo tulipoona ipo haja ya kunasa talanta tele hapa ili kuzitumia vyema na ninashukurua hata wanafunzi wenyewe wamegundua hilo na wanashiriki vyema katika mazoezi haya ya nyimbo za kiasili.” Akasema.

Na kuhusu jinsi walivyocheza mjini Kilifi na kuibuka wa pili,mwalimu huyo aliwashukuru wazazi na walimu wa Uyombo kwa kumtilia mkazo katika kazi yake na vile vile kuwaasa wanafunzi kuhusu umuhimu wa tamasha kama hizi.

”Kila jambo linahitaji ushirikiano na hili ndilo lililokuwa wazo letu tukiingia katika mashindano haya ya tamasha za wilaya na kile kilichijiri kilikuwa cha kutufurahisha mno.” Akasema mwalimu huyo.

Na huku wakiendelea kungojea barua ya kuitwa katika tamasha za ngazi ya mkoa,mwalimu mkuu wa shule hiyo Bw.Bosco Deche alikuwa akiomba udhamini zaidi ili kuendeleza vipaji hivi vya wanafunzi walio na talanta shuleni.”Sisi katika shule yetu tumebarikiwa kuwa na vijana ambao wana talanta tele lakini tatizo ni ukosefu wa watu wakufuatilia na kunasa talanta hizi na hili tunataka tusaidike ili ndoto zao zifanikiwe.” Akasema.

Iliniajabia kuwa mbali na tamasha hizi za kitamaduni,shule hii ya Uyombo vile vile hutoa wachezaji ambao hufika hata katika ngazi ya kitaifa lakini ambao baadaye hurudi vijijini wakiwa wanahaha kwa kukosa ufadhili.Aidha mwalimu huyo mkuu alisema kuwa mbali na kuwatoa wanamichezo bora katika wilaya ya Kilifi,shule ya msingi ya Uyombo sasa inatawala katika mbio na michezo mingine ya viwanjani huku mwanafunzi wao mmoja akiwa mjini Kisumu kwa mashindano ya kitaifa.

Naye mwenyekiti wa shule hiyo Bw.Wilson Kaboga alisema kuwa nyimbo za asili zina umuhimu katika tamasha kama hizi na akasema wao wataendelea na mipango kabambe ya kuzikuza talanta za wanafunzi hao shuleni humo.

”Hatuwezi kuona vijana hawa wakiwa na talanta tele shuleni mwao lakini badala ya kuzieneza tuwaache tu hilo halitafanyika hapa Uyombo na kwamba mambo mengi yetu ambayo tunafanya tunayatekeleza kwa kuangalia hatima ya wanafunzi wetu pindi tu watakapomaliza shule.” Akasema.

Na huku kikundi hicho kikiondoka jukwaani baada ya kutoa tumbuizo la kukata na shoka,wakubwa waliachwa wakijiuliza,je ni lini talanta kama hizi zitakapoenziwa na kutuzwa kama inavyofanyika katika ngazi za kitaifa na hata kimataifa.

Mikoko inafaa kutunzwa kama wafanyavyo hawa vijana wa Majaoni huku Mombasa.

2008-07-23T21:50:00.000-07:00

Hapa vijana hawa wanaonekana wakimuonyesha muandishi Lewa Jefwa jinsi wanavyofanya kazi zao katika mradi wao wa kukuza mikoko katika kijiji cha Utange-Majaoni huko Mombasa.

Note:Shukrani zangu kwa Bwana Lewa Jefwa kwa kuniruhusu kutumia habari hii kutoka kwa makala zake anazochangia hapa Mombasa.

Kazungu

WANAPANDA MIKOKO KUTUNZA MAZINGIRA

Kijiji cha Majaoni ni kijiji ambacho kimejificha kwa utulivu katika eneo la Mombasa kaskazini.Kinapatikana karibu na kituo cha biashara cha Shanzu karibu na eneo la Mtwapa.

Hata hivyo mbali na utulivu ambao unakiandama kijiji hiki,kikundi kimoja cha vijana katika sehemu hii kimedhihirisha nia yako kubwa ya kutunza mazingira hususani upanzi wa mikoko.

Hivi majuzi nilibahatika kukutana na vijana hao wakiwa katika shughuli zao za kuwatembeza wageni katika mradi wao ambao sasa umekuwa kielelezo katika sehemu hii ya Majaoni.

Na katika kile kilichoanza tu kama kikundi cha kujaribu kuwaleta pamoja vijana wa Majaoni,sasa kikundi cha Majaoni Youth Development Group kimeanza kuwavutia watafiti wa mazingira kutoka idara tofauti ambao hufika hapa kuelezwa kwa kina na vijana hawa jinsi wanavyotekeleza mradi wao.

Ni kikundi ambacho kilianzishwa mwaka wa 2003 na vijana 11 kutoka mtaa huu wa Majaoni na leo hii juhudi zao za kukuza mazingira bora zimekuwa zikiwavutia watu wengi ambao hufika kila mara katika mradi huu.

Na kwa muda huu wote ambao wamekuwa wakijishughulisha na kazi hii ya upanzi wa mikoko na miti mingine mingi vijijini,wamefaulu kupanda zaidi ya mikoko 30,000 katika ufuo wa huu wa Majaoni.Wao hupanda mikoko kila msimu wa mvua unapokaribia na ni bidii ndiyo ambayo imefanya baadhi ya sehemu ambazo awali zilikuwa zimekatwa miti hii kuwa tena na mikoko.

Wanachama ambao wanaunda kikundi hiki ni Bw.Lucas Fondo ambaye ndiye mwenyekiti wa kikundi hiki,David Taura ambaye ni katibu wa kikundi hiki akisaidiana na Daniel Shida naye Caroline George akiwa mweka hazina wa kikundi hiki.Wanachama wengine ni Kahindi Kazungu,Saumu Iddi,Mboje Idd,Musa Kalama,Morris Ngome,Samuel Deche na Patrick Kivatsi.

Akiongea na Taifa Leo kwenye mradi wao,msemaji wa kikundi hiki David Taura alisema kuwa ingawa wao walianza miradi yao mwaka wa 2003,lengo la kuanzishwa kwa kikundi hiki lilikuwa limeafikiwa mwezi wa Desemba mwaka wa 2002.

”Tuliamua sisi kama vijana katika eneo hili tunahaja ya kuboresha mazingira yetu na jambo la kwanza lililotujia akilini ilikuwa ni kuanza kutunza mikoko hii ambayo ilikuwa ikiangamia kwa wingi kutokana na ukataji kiholela.” Akasema.

Na punde tu baada ya habari zao kuanza kujulikana kijijini,washika dau katika sekta ya mazingira kutoka kwa mashirika yasiyo ya kiserikali na hata idara za serikali zinazohusiana na mzingira wamekuwa wakifika hapa na kujionena jinsi vijana hawa wanavyofanya kampeni kabambe kuhakikisha kuwa mazingira hayaharibiki.”Sisi lengo letu ni kulinda mazingira yetu na jambo hili linaanza kutimia kwa sasa.

Na Je wanakijiji wamechukuliaje juhudi za kikundi hiki kuamua kutunza mazingira na kupinga ukataji ovyo wa mikoko ambao unahatarisha hata samaki na viumbe wengine wa baharini ambao hutegemea mmea huu kama chakula chao?

Taura anasema kuwa ilikuwa kazi ngumu kwani wakazi wengi walikataa mwito wetu wa kutokata mikoko na waliendelea lakini hili halikuwavunja moyo na leo hii wanaendeleza kampeni zao huku baadhi ya wanakijiji wakikubaliana nao.

”Kila kitu kinapoanza huwa vigumu mno kwa sababu wanakijiji hawa hawakutaka kutusikiliza nyakati za mwanzo lakini jinsi tulivyoendeleza na kampeni zetu basi hapo ndipo walipobaini kile tulichokuwa tukiongea.” Akasema

Na juhudi zao za kuwataka wakazi wa Majaoni watunze mazingira kwa kupanda miti hazijaishia tu vijiji,Kahindi Kazungu ambaye ni mmoja wa wanachama wa kikundi hiki amekuwa akizunguka kutoka shule moja hadi nyengine kupeleka ujumbe huu wa kupanda miti.

“Tunalenga hata shule na maeneo mengine ya hadhara kama vile mikutano ambapo ari yetu itafikia wengine na tunashukuru kuwa juhudi hizi sasa zinaelekea kufaulu.” Akasema huku akituonyesha eneo ambalo walipanda mikoko baada ya miti hiyo kukatwa na eneo hilo kubaki bila hata mti mmoja.

”Unaona eneo hili,hii ni mikoko ambayo sisi tulipanda baada ya uharibifu ambao ulikuwa umefanywa awali kwa hivyo hizi ni juhudi ambazo zinafaa kujengwa na kukuzwa.” Akasema Danile Shida ambaye ni naibu katibu katika kikundi hicho.Mwaka huu,kikundi hiki kilipata wageni kutoka maeneo mbalimbali ikiwemo vyuo vikuu ambao hufika na kufanya utafiti wa viumbe wa majini katika ufuo huu.

Vile vile shirika la Pwani Christian Community Services(PCCS) ambalo ni kitengo cha kanisa Angilikana dayosisi ya Mombasa liliamua kuwafadhili na kuwapa miche 60,000 ambayo wamekuwa wakitoa kwa wakazi vijijini ili kupanda kama njia mojawapo ya kutuna mazingira.

Si hayo tu,Shirika la Diaknie Emergency Aid liliko jijini Nairobi majuzi liliwatuma watu wake kuja na kuangalia na kujifahamisha kuhusu mradi huu wa kukuza mikoko unaoendelezwa na kikundi hiki.

Wawili hao Dkt.Jane Wamatu na Roland Kilian Schlott walifurahishwa na mradi huu na kuwasifu vijana hao kwa juhudi zao.Vile vile Shirika la East Africa Wildlife Services (EAWLS) limekuwa likiwatuma baadhi ya maafisa wake kuangalia jinsi vijana hawa wanavyofanya kazi ya kutunza mazingira na zile changamoto ambazo wanakumbana nazo wakiwa katika shughuli zao.

Kutokana na bidii yao,wamekuwa kielelezo cha kutolewa mifano hivi kwamba sasa wanatambuliwa na kitengo cha viumbe wa baharini katika shirika la KWS na vile vile idara ya misitu katika wilaya ya Mombasa.

Hivi ndivyo akina dada wetu wanafanya wakiwa ufuoni

2008-07-21T05:28:00.000-07:00

Kimsingi masuala ya uchezaji kama huu ulichukuliwa kama usioweza kufanywa katika sehemu hii ya pwani lakini sasa angalia hali ilivyo kwa sasa.Wasichana hawa walikuwa wakicheza katika ukumbi wa Jomo Kenyatta huko Bamburi mjini Mombasa.

Mkutano wa WAKITA ulivyofaulu hapa jijini Mombasa.

2008-07-21T02:35:00.000-07:00

Hawa ndiyo viongizi wa chama cha WAKITA ambao walichahuliwa katika mkutano uliofanyika katika ukumbi wa Royal Castle Hoteli katikati mwa jiji la Mombasa.

Picha ya juu ni mhariri mkuu wa Taifa Leo Fred Waga akiongea na mwenyekiti wa WAKITA Dkt.Abdul Noor.

Katika picha nyengine wanachama wa WAKITA wakisikiza kwa makini hotuba za viongozi wao.

MKUTANO WA WAKITA WAFAULU PWANI

Mkutano wa chama wa wasomaji wa magazeti ya Taifa Leo uliofanyika jijini Mombasa juzi ulifana mno.Mbali na idadi kubwa ya wasomaji na mashabiki wa gazeti ambao walijitokeza katika mkutano huo,iligundulika kuwa kuna vipaji tele vya sanaa na hivi kwamba gazeti la Taifa Leo linatakikana kufanya juhudi kubwa kunasa vipaji hivi. Katika mkutano huo ambao ulifanyika katika hoteli ya kifahari ya Royal Castle Hotel iliyoko katika barabara ya Moi katikati kabisa mwa jiji hili,viongozi wapya walichaguliwa kuendesha jahazi hili la WAKITA. Ni katika mkutano huo ambapo mhariri mkuu wa gazeti la Taifa Leo Bw.Fred Waga pamoja na afisa wa usambazaji Harry Njagi walijumuika ana kwa ana na wasomaji wa magazeti haya. Vile vile mbali na wakuu hao wawili,kampuni ya usambazaji wa habari ya Nation iliwatuma waandishi wao Daniel Muchai,Nuhu Bakari na Douglas Mutua ambao pia walijumuika pamoja na wasomaji.Pia kulikuwa na sherehe mbalimbali ambapo kulikuwa na mashindano ya kutunga na kughani mashairi.Mada kuu ya ambayo wasanii walipaswa kuchangia ilikuwa ni Je mtu kuuitwa mlevi huwa ni sababu gain. Kwenye mashindano hayo,Yusuf Zema ambaye pia hughani mashairi katika kituo kimoja cha FM jijini Mombasa aliibuka mshindi na kutuzwa papo hapo Sh.3,000 pesa taslim.Ali Maingu ambaye pia ni mtangazaji hapa pwani aliibuka wa pili na kutuzwa Sh.2000 pesa taslim. Naye chipukizi Kitsao Samuel Baya ambaye ni mwanafunzi wa mawasiliano katika chuo kimoja jijini Nairobi aliibuka wa tatu na kutuzwa Sh.1,000 pesa taslim.Wote walituzwa mbele ya mashabiki waliofurika ukumbini na afisa wa usambazaji wa magazeti haya Harry Njagi.Vile vile kulikuwa na vichekesho ukumbini kutoka kwa msanii Mango Juma ambaye alimchekesha kila aliyekuwepo ukumbini kwa uwezo wake wa kuiga lugha za watu maarufu nchini na kimataifa. Akiongea baada ya kusikiza maoni ya mashabiki wote waliochangia,mhariri mkuu alisema kuwa baadhi ya kurasa ambazo ziliondolewa baada ya gazeti hili kufanyiwa mabadiliko mwezi wa januari zitashughulikiwa.Alisema kurasa hizi ni kama ule wa makala ya elimu ambao alikiri kuwa umekuwa haba lakini akasema ukurasa huo utarudishwa hivi karibuni. “nimesikiliza maoni yenu kwa makini na kile ninataka kusema ni kuwa yatashuhgulikiwa ingawa baadhi yao yatachukuwa muda kwa vile mpaka yapitishwe katika mikutano yetu;kile ninataka kuwaeleza hapa ni kuwa ule ukurasa wa makala ya elimu utarudishwa kwa vile ulikuwa muhimu sana.” Akasema na kupigiwa makofi. Awali baadhi ya wasomaji walikuwa wamehoji kuhusu kuondolewa kwa ukurasa wa Wanawakita ambao ulikuwa ukiendelezwa kila jumatatu.Mwenyekiti wa WAKITA Dkt Abdul Noor alimtaka mhariri mkuu afanye juhudu kuurudisha ukumbi huo ambapo habari za WAKITA zitakuwa zikichapishwa kila wiki.Awali ukurasa huo ulikuwa ukitumika kila jumatatu lakini muundo mpya wa gazeti ukafanya ukurasa huo uondolewe.Naye Harry Njagi ambaye alielezwa kuhusu shida za kupatikana kwa magazeti ya Taifa Leo katika maeneo ya mashambani aliahidi kuwa magazeti haya sasa yataanza kufika katika maeneo hayo hivi karibuni.Awali wakati wakitoa maoni yao kwa wakuu hawa wa Taifa,baadhi ya wachangiaji walilalama kuwa gazeti hili jipya la Taifa halifiki tena katika maeneo ya mashambani kama ilivyokuwa zamani.Mweka hazinga wa WAKITA Mzee Mohamed Akwabi alitaka gazeti hilo lifike kwa wingi mkoa wa magharibi kwani ni kama umesahaulika. Baada ya hoja hizo,maafisa wapya wa chama cha WAKITA walichaguliwa.Dkt Abdul Noor kutoka Nakuru alihifadhi kiti chake kama mwenyekiti.Mzee Mohamed Akwabi pia alihifadhi kiti chake kama mweka hazina wa WAKITA huku Kinyua Kingori ambaye awali alikuwa katibu mtendaji sasa ni naibu mwenyekiti wa WAKITA.Mshairi wa miaka mingi kutoka pwani Mahmoud Hassan Chatu alichaguliwa katibu mkuu na atasaidiwa na Dennis Otingo. Ali Maingu sasa nfiye katibu mtendaji huku akisaidiwa na Al Amini Somo naye Ann Njeri ambaye ni mkereketwa wa lugha ya Kiswahili akachaguliwa kama kiongozi wa akina mama katika chama cha WAKITA.Ali Khamis Chembea sasa ndiye afisa wa uhusiano mwema katika WAKITA na atasaidiwa na Wanto Warui kutoka Kajiado.Harry Njagi alipitishwa kwa kauli moja na waliohudhuria kuwa mlezi wa WAKITA na mshirikishi wa chama hicho katika kampuni ya usambazaji habari ya Nation. Na akiongea pindi tu baada ya kuchaguliwa tena mwenyekiti,Dkt Noor aliwataka wanachama wote wa WAKITA kuwa kitu kimoja na kuendeleza miradi itakayowafaidi maishani.Alisema kuwa tawi la WAKITA pwani ambalo lilivunjwa miaka mitatu iliyopita baada ya kukumbwa na migogoro ya uongozi litafufuliwa tena hivi karibuni na akawataka mashabiki wa Taifa kujitokeza kujisajili pindi tu tawi hilo litakapofunguliwa tena.”Ninasema hapa kuwa tawi la pwani litaanzishwa tena mwezi ujao na ninawaomba watu wengi wajitokeze pindi tu litakapoanzishwa.” Akasema Vile vile mwenyekiti huyo alisema ufufuzi wa WAKITA pwani baadaye utafuatiwa na ule wa WAKITA Nairobi ambayo sawia ilivunjwa kwa sababu ya malumbano makali.Aliwataka Wakenya waishi kwa amani huku akiwataka wasomaji na wachangiaji wa WAKITA waeneze ujumbe wa amani kupitia kwa maandishi yao.Naye katibu mkuu mpya Hassan Chatu aliwataka mashabiki wote wa Taifa Leo washirikiane naye kwa ajili ya maendeleo chamani.

Mwisho.

Mambo haya yanafanyika hapa pwani-Kenya.

2008-07-05T05:20:00.000-07:00

DONDOO

MARIAKANI-KALOLENI

Hali ya taharuki na wasiwasi ilitanda majuzi katika kituo hiki cha biashara baada ya kiwete mmoja kufika hapo na kamba shingoni akitaka kujinyonga kwa dai la kusalitiwa na mpenzi wake aliyempenda.

Kwa takribani dakika kumi hivi,manamba na watu wa kujitolea walikuwa na wakati mgumu kumtuliza kiwete huyo ambaye alikuwa akilia kwa sauti huku akimuonyesha kila mtu ujumbe ambao alidai aliletewa na msichana ambaye alikwua akipanga kumuoa hivi karibuni.”Kwa kweli kwa jinsi mambo yalivyo sasa,inaonekana mrembo wangu ataniacha tafadhali nisaidieni jamani,” akalia kabla ya kutisha kujitoa uhai.

Miongoni mwa wale waliojipata katikati ya kasheshe hii ya kiwete hii ni jinsi alivyokuwa akionyesha ujumbe huu.Katika ujumbe huu ambao mdokezi wetu aliwahi kuusoma,demu alisema kuwa amekatisha uhusiano na kijana huyo mlemavu bila kuongeza zaidi.”Uhusiano wetu umeisha kwa hivyo sina mengi zaidi ya hayo,tayari nimwaeleza wazazi wangu kuhusu uamuzi huu.” Ikasema sehemu ya ujumbe huu.

Hata hivyo mdokezi wetu aliyekuwa katika shughuli za kikazi mjini Mariakani alilazimia kuondoka eneo hilo kutafuta usafiri kurudi jijini Mombasa,huku akimwacha kiwete huyo akiendelea kupatiwa mawaidha kuhusu hali ya kimaisha na jinsi ya kuepuka dhana hiyo.

Mwisho.

DONDOO

JILORE-MALINDI.

Mzee wa makamu anaendelea kuuguza majeraha ya mbavu baada ya kuanguka katika shimo linaloendelea la choo akifukuza kipungu aliyechomoa samaki mkubwa katika pakacha lake.

Kisa hicho cha kusikitisha kilifanyika katika kijiji kimoja sehemu hii majira ya asubuhi baada yam zee huyo kukseha mtoni akivua samaki.”Alikuwa ndio mwanzo anaanza kuwatayarisha samaki wake wakati kipungu huyo(Aina ya mwewe mkubwa) alifika na kunyakua samaki mkubwa katia ya wote.” Akasema kijana wa mzee huyo alipokwua akiongea na mdokezi huyo.

Kuona samaki mkubwa akienda na kipungu huyo hakukumfurahisha buda ambaye bila kufahamu yaliyomngoja alifululiza mwendo kumkimbiza kipungu huyop ambaye hata hivyo aliendelea kupaa juu mbio mbio.Ni katika kimbia kimbia hizo ndipo mzee alijipata akianguka ndani ya shimo na kuumia mbavu.Kilio cham zee akiomba usaidizi kiliwafikia majirani ambao walifika mbio na kumtoa huku akiendelea kuguna na kupiga kite.

”Haki ya mungu kipungu huyu nikimpata nitammaliza.” Akaendelea kulia mzee huyo kabla ya kukimbizwa katika zahanati ya karibu ambapo alitibiwa.Hata hivyo kulingana na kijana wake,mzee huyo sasa anaendelea na nafuu baada ya kubainika kuwa alipata mikwaruzo tu wala hakuvunjika mbavu.

Mwisho.

DONDOO

JIJINI MOMBASA.

Sekrtari ambaye alikuwa ameaminiwa mno na mdosi hadi kufikia hatua ya kukingiwa makosa yoyote na mkurugenzi huyo sasa amemwaga unga baada ya bosi kugundua kuwa msichana huyo wa afisini mwake amekuwa akimdokezea mama watoto na baadhi ya maadui wake wa biashara baadhi ya siri muhimu za kazi yake.

Kuligana na mmoja wa wanfanyikazi ambaye alikuwa wa kwanza kupata habari hizo kabla ya kumjulisha mwana dondoo wetu,ni kuwa msichana huyo baada ya kupata kazi ya kuwa sekretari wa bosi amekuwa akijivuna mno na kuwaona wafanyikazi wenzake kama vidudu mtu ambao kamwe hawawezi kumfikia pale alipo.Kwa maana hiyo,amekuwa akiringa huku hata akifanya makosa mdosi anakuwa mtu wa kwanza kumtetea dhidi ya tuhuma.

Hata hivyo juzi,mdosi alishtuka alipopata habari za siri ya kampuni yake katika afisi jirani ambayo wanafanya kazi sawia.Hapo ndipo alipouliza kwa makini na kwa ujasiri wa hali ya juu akafahamishwa kuwa ni sekrtari huyo ndiye ambaye amekuwa akitoa siri zake kwa mdosi jirani na kuchotewa kiasi kikubwa cha fedha.

”We bwana unasemaje,sisi tunanunua hizi habari zako kutoka kwa sekrtari wako.” Akasema meneja katika kampuni jirani.Ndipo akaanza uchunguzi na muda sio muda akampata demu huyo akitoa ripoti ya fedha kwa afisi jirani.Hapo bila kusita alimfuta kazi papo hapo na asa demu anahaha kwa kukosa kazi.

Mwisho.

DONDOO

LIKONI-MOMBASA.

Jamaa ambaye aliamua kuwachukua watoto wake sita hadi katika kituo cha kuwatunza mayatima kwa dai kuwa hana lolote maishani sasa amerudishiwa watoto wake baada ya wasimamizi wa kituo hicho kugundua kwamba buda huyo alitaka mwanya wa kuwa pekee ili aendelee kuponda maisha na vipusa mitaani.

Cha ajabu na ambacho bado kimewashanza wengi ni jinsi mzee huyo alivyoweza kuwateka akili wenye kituo hicho na kuonekana kuwa mtu aliyezongwa na mashaka tele huku akiwa katika hatua zake za mwisho duniani.

”Alifika kituoni kama mtu ambaye anakaribia kufa na alionekana kukata tama kabisa ndipo tukawachukua watoto hawa baada ya kutuelezea kuwa mkewe alifariki miaka miezi sita iliyopita.” Akasema mmoja wa walezi kituoni hapo.

Hata hivyo juhudi za wenye kituo kufumbua fumbo la buda huyo mjanja hazikuchukua muda mrefu kwani kalameni alibambwa katika klabu kimoja cha usiku akila raha na vimwana mtaani humu.

Vile vile pindi tu bibi alipoata habari hiyo aliamua kufika kituo cha mayatima na kukutana na wanawe ambao walikuwa na hamu ya kumuona mama yao.

Hapo ndipo wenye kituo walitaka kufahamu kama mzee alisema kweli kuwa mama alifariki lakini mama huyo akasitiza kuwa ni yeye ndiye mwenye watoto hao na kwamba yupo hai isipokuwa alikuwa ameachana na mzee huyo kutokana na tabia yake ya kupenda viwwana wadogo wadogo.

Hapo ndipo buda alinaswa na kurudishiwa watoto hao huku aiambiwa alipie gharama ya watoto hao au afungwe jela.Ingawa alitaka kujitetea buda aligundua kuwa mambo yalikuwa magumu na akakubali uamuzi wa jopo la kijiji.

Mwisho.

DONDOO

KIWEIRERA-LIKONI

Buda ambaye hupenda pombe kuliko masuala yoyote ya nyumbani juzi alikuwa kicheko cha asubuhi kwa wakazi wa sehemu hii baada ya kuuza kitenge cha WAX cha mama watoto ili kulipia deni la pombe aliyokunywa siku mbili zilizopita.

Ilidaiwa kuwa mzee huyo alikuwa amemhadaa muuzaji wa pombe hiyo kuwa angelipata fedha zake kwa muda wa siku mbili ila tu kufahamika kuwa hata jamaa kumbe ni kibarua tu na hana kazi ya kudumu.

Ahadi yake ilitokana na kibarua ambacho alikuwa akipata katika muda huo lakini akashtuka kuamibiwa kuwa laini ilikuwa imekatika.Ndipo asubuhi hiyo muuzaji pombe akabisha hodi na juhudi za polo kutaka kutorokea na mlango wa nyuma zikakwama baada ya mlango huo kuufungwa kwa kufuli na mwenye nyumba.

Kuona hataweza kukabiliana na mama muuzaji,jombi aliamua kutoa lile rinda la kitenge,ambalo ni mojwapo ya marinda ambayo mama watoto huyapenda sana akienda katika mikutano ya akina mama kijijini.

Yote haya yakifanyika mama watoto alikuwazake sokoni Kongowea na aliporudi mwendo wa saa nne,akagundua mara moja rinda lake la kitenge.Hapo aliuliza na huku mzee akisita kuongea,majirani walisema kuwa bwana huyo alitoa rinda hilo kwa muuzaji pombe ya kienyeji.Lo hasira kweli ni hasara kwani mama watoto alishindwa kujizuia na kuanza kumimina mvua ya makonde kwa polo huyo hadi akazimia.Pia hakuachia hapo alifululiza hadi kwa muuzaji pombe ambaye alitorokea dirishani alipomuona bibi ya polo akienda.Haikufika jioni,mama alikuwa amepata kitenge chake huku mzee akiwa na majeraha.

Mwisho.

DONDOO

MIKANJUNI-JOMVU.

Kalameni mmoja katika eneo hili ambaye wakati Fulani alijipata katika hali ya kutatanika baada ya kukojolewa na paka akiwa amelala na mkewe sasa anadai huo ulikuwa ni urogi wa wazi baada ya kushindwa kabisa sasa kujamiana na mkewe.

Akiongea na mdokezi wetu,kijana huyo wa makamu ambaye kwa sasa ana watoto wawili alisema kuwa masaibu yake ya kufanya tendo la ndoa yalianza siku chache tu baada ya kukojolewa na paka huyo akiwa amelala na mkewe.

“Mimi sasa sina raha kabisa,ninajaribu kujua kilkichofanyika na kila mganga ambaye ninapata fursa ya kwenda kwake anasema jogoo langu lilipata mshtuko kutokana na urogi huo na sasa huenda sitazalisha tena maishani.” Akasema kwa huzuni.Aidha alisema kuwa amekuwa akifika kwa madaktari mbalimbali lakini anaamibiwa kuwa mambo yatakuwa shwari ila tu hakuna kinachofanyika.

Huku akionekana kama mwenye mfadhaiko wa mawazo kuhusu shida hii,kijana huyo alisema kuwa anaamini hili lilikuwa tukio la urogi ingawa hajafahamu kamwe kama ni nani ambaye ni mhusika mkuu katika tatizo hili.

”Sitasema kumaliza roho yangu lakini ukweli wa mambo ni kuwa mimi nilirogwa kwa sababu nilikuwa nikitimiza majukumu yangu vizuri nikiwa kitandani lakini sasa yanayotokea yananitia wasiwasi.” Akasema.

Mwisho.

DONDOO

KIWANDANI-KILIFI.

Jamaa ambaye anajulikana sana mtaani kwa wivu usiomithilika sasa ameamua kuacha kazi na kubaki na mkewe nyumbani kwa vile amekuwa akidai kuwa mkewe hugawa tunda lake pindi tu anapoondoka kwenda kazini.

”Sitataka tena kwenda kazini kwa vile kila nikienda kazini mke wangu naye hufuatwa na vijana barobaro na hilo ni jambo ambalo katu siwezi nikalikubali katika maisha yangu.” Akasema baada ya kuhojiwa shida ya yeye kuacha kazi.

Majirani ambao waliongea kuhusu tukio hilo walisema kuwa kijana huyo amekuwa na shida zinazohusiana na masuala ya kinyumbani na mkewe na zaidi sana ikiwa ni wivu ambao umeshindwa kumuondokea polo huyo.

Vile vile juhudi za kijana huyo kufika katika kongamano za kijamii ili kuelezewa kuhusu uhalisia wa maisha pia zimekuwa bure bilashi kwani huwa kila aambiwalo haamini na hivi kwamba amejenga taaswiri hiyo kumhusu mkewe.Ndipo sasa inadaiwa kuwa bibi naye ameamua kuwa sasa ni afadhali aondoke na sasa jamaa amebaki kapera huku fauka ya haya akiwa pia hana kazi.

Mwisho.

DONDOO

MOI AVENUE-MOMBASA.

Kulikuwa na kituko cha muda kilichosimamisha shughuli za kibiashara katika barabara hii baada ya jamaa mmoja aliyekuwa na hasira za mkizi kuamua kutokubali demu aliyekuwa akiburudika naye kumuondokea baada ya kupata mwenye hela zaidi.

Kisanga hiki kiliwapata wakazi wa jiji la Mombasa ambao walikuwa wakiregea majumbani mwao baada ya shughuli za siku wakiwa na mshangao mkubwa huku demu na polo wakifukuzana kama watoto wadogo.

”Kwanini sweetie unaenda ni mimi niliyeanza nawe sasa mbona unaniacha kwa huyo jamaa.” Akalia polo huku demu akiwa ameshikana mkono na jamaa aliyeonekana kuwa amejaa hela hasa kutokana na jinsi alivyokuwa amevaa.Kwanza polo alikuwa amevaa bling za bei mbaya na alidhaniwa kutoka jijini Nairobi.

Awlai ndani ya mkahawa kulimoanza vituko,wahudumua walisema kuwa demu aliingia akiwa na kijana wake ambye hata wao wamezoea lakini ghalfa akaingia jamaa huyo aliyekuwa amejikwatua kwa viwalo vya pesa mbaya na kufululiza hadi pale alipokwua msichana.

Baada ya maongezi machache waliondoka wote na kumuacha kijana wa Mombasa akiwa hajui atafanya nini.Hapo ndipo kijana akaanza kulia na kumfuata jamaa mbio hadi nje ambako nako ilikuwa kasheshe tele hadi walipopotela katika eneo la Mwembe Tayari.Haikujulikana hatima ya polo huyo ila wengi walidhani huenda demu huyo hakuwa na mapenzi ya dhati kwa kijana huyo wa Mombasa.

Mwisho.

Msanii anayeweza kuiga sauti za viongozi na watu mashuhuri Kenya.

2008-07-04T04:15:00.000-07:00

Picha hizi zinamuonyesha msanii Mango akiwa anatumubiza katika hafla moja mjini Mombasa hivi majuzi.Yeye anaweza kuiga kwa urahisi sauti za watu.

VIPAJI TELE VYA MCHEKESHAJI MANGO

Unapokutana na msanii Bakari Mango ;( Yeye hudai ni mango lakini sio maembe) akiwa katika harakati zake za kutafuta maisha jijini Mombasa,unaweza kumdhania tu kama yeyote ambaye hana lololte linaloweza kukufanya umuangalie na kumuweka katika fikira zako.

Lakini pindi tu atakapoanza kuigiza sauti ya Rais Mstaafu Daniel Moi na ile ya Waziri Mkuu Raila Odinga,basi hapo ndipo utakapobaini kama uliyeonana naye hasa ni nani.

Karibu katika ulimwengu wa Bakari Mango,msanii ambaye pindi tu unapomkuta viwanjani akitangaza mpira,basi bila kumuona utadhani watagazaji maarufu wa kandanda Ali Salim Manga,Jack Oyoo na Leonard Mambo wamo uwanjani.

Hutasadiki mpaka pale utakapoabaini kuwa yule aliyeshika kipaaza sauti sio mwengine bali ni msanii Bakari Mango.Yeye ni msanii jijini Mombasa ambako amepiga kambi tangu mwaka wa 1985 alipotoka kwao eneo la TransNzoia.

Hivi majuzi nilipata fursa ya kuongea na msanii huyu katika jumba la posta kuu ambako anafanya kazi kama tarishi.

Je Alianzaje mambo haya ya kuigiza sauti hizi za watu mashuhuri kote duniani na jinsi anavyomudu kuongea takribani katika lahaja zote nchini.”Ni mazoea na mimi mwenyewe awali nikiwa katika shule ya msingi ya Mukuyu huko Transnzoia nilizoea kuimba na kughani mashairi na ni hapo ndipo nilipogundua kwamba hata kuongea na kuiga sauti za watu maarufu haikuwa kazi kubwa.” Akasema katika mahojiano yetu.

Msanii huyu majuzi alikuwa miongoni mwa wasanii waliochangamsha mashabiki wa Taifa Leo na wana WAKITA ambao walikuwa wakihudhuria kongamano la kustawisha lugha ya Kiswahili ambayo iliandaliwa na kampuni ya usambazaji habari ya Nation katika hoteli ya kifahari ya Castle Hotel katikati mwa jiji la Mombasa.

Kutokana na umaarufu wake,msanii huyu alituzwa fulani mbili za Taifa Leo na msimamizi wa hafla hiyo Nuhu Bakari.Akiwa mbele ya maafisa wakuu wa Taifa Leo akiwemo meneja wa uhariri Fred Waga na afisa wa usambazaji Harry Njagi,Mango aliweza kuufanya umati uliokuwepo ndani kuvunjika mbavu hasa alipokuwa akimwiga Rais Mstaafu Daniel Moi.

”Nilijisikia mwenye hadhi kwa kupewa nafasi ile katika WAKITA na kudhihirisha jinsi ninavyoweza kueneza talanta yangu katika masuala haya ya sanaa.” Akasema juzi akiregelea matukio ya siku hiyo.”Kwake Mango,usanii una tawala katika damu yake hivi kwamba kila analofanya huwa mwishowe linadhihrisha chembe chembe za usanii.

Kwa mfano hata kazini anakofanyika kazi,mkubwa wake anamfahamu vyema kuwa yeye ni msanii wa vichekesho hivi kwamba mara nyengine huwachekesha hata wafanyikazi wenzake kutokana na anayoyafanya.

”Mimi nataka kila mtu acheke na awe na furaha moyoni;ninachekesha watu nikijua kabisa kuwa mtu anapocheka,sio rahisi kumdhuru mwengine na hili ndilo linaliniteremesha.” Akasema.

Alipokuja jijini Mombasa mwaka wa 1985, aliajiriwa na kampuni ya ulinzi ya KK Guards kama askari lakini pindi tu alipoanza kutumbuiza katika mikutano na hafla za shirika lao,wakuu wake walitambua kipaji alichokuwa nacho na kumpandisha cheo hadi akawa msimamizi wa gari la kubeba walinzi(Crew Commander).

Hili anasema lilimfurahisha mno na kuamini kuwa hata sanaa inaweza kumfanya mtu akatambuliwa kokote nchini na katika nyanja mbali mbali.”Mimi nikiwa KK Guards nilipandishwa cheo kutokana na jinsi nilivyoweza kuwachekesha na kutumbuiza katika mikutano yetu na hali hii yamkini iliwafurahisha wakubwa.” Akasema

Awali alisema kuwa alikuwa akivutiwa sana na wana vitimbi kama vile Mzee Ojwang(Benson WAnjau) na Davis Mwambili(MWala) pamoja na Allan Namisi(Oloibon).Hawa ni wasanii ambao Mango anasema wanajivunia juhudi na talanta zao za kuwa wana vichekesho.

Baada ya kuhudumia shirika la KK Guards kwa muda mrefu hatimaye Mango aliamua kuacha kazi hiyo mwaka jana na kugeukia masuala mengine maishani.Alisema katika mahojiano yetu kuwa kuna nyakati ambazo hatawahi kusahau akiwa katika sanaa hii ya utumbuizaji.

Anataja mfano wa mwaka jana ambako alijikuta akial chakula katika meza moja na aliyekuwa waziri wa vyama vya ushirika Njeru Ndwiga wakati alipokuwa mjini Malindi kufungua tawi la benk ya KITECO.”Watu walishangaa kwa sababu mbali na ulinzi mkali,Ndwiga mwenyewe aliniruhusu nijumuike nao ukumbini baada ya kuwaongoa na kuwaacha watu wote hoi kwa kicheko kutokana na viigizo vyangu.” Akasema.

KWa hivyo inahitaji nini ili mtu aweze kunakili na kuiga sauti za watu bila taabu yoyote.”Kwanza ni sharti uwe na kipawa halafu jambo la pili,ni kuifanya wewe ni yule mtu unayetaka kumuigiza na hapo ndipo utakapofaulu.” Akasema kabla ya kuanza kuigiza sauti ya waziri mkuu Raila Odinga na mgombeaji wa kiti cha Urais Marekani Barack Obama.

Pia Mango amebatizwa jina la Kimaasai akiitwa Lenana.Hii ni kutokana na ukweli wa mambo kuwa jamaa huyu anaweza kuongea kwa lahaja ya kimasaai na ukaamini mtu aliye mbele yako ni Mmasaai kamili.Pia Mango anaweza akaongea kwa lahaja ya Kigiriama,Kikamba,Kikikuyu,Kiluo na kukufanya uamini kuwa yeye ni wa kabila hilo.

Hata hivyo alikiri katika mahojiano yetu kuwa ingawa anajaribu kwa kina kufanya uwezo kamili katika kuigiza lugha za watu,bado anasema sauti ya mtangazaji Leornad Mbotela bado huwa ngumu kwa vile mtangazaji huyo huongeza kwa mkazo mwingi na kumfanya kila anayetaka kumuiga kuwa na kibarua kigumu.”Sauti ya Mambo ni ngumu kuiweka vyema kwa vile yeye kila anapoongea hutumia mkoazo mwingi katika sauti yake na hilo huwa gumu kidogo.”akasema.

Na ni wazi Mango anajivunia usanii huu kwani anasema umempeleka mbali,kuanzia Meru,Maua,Malindi Kilifi na sehemu mblaimbali za pwani.Huku kote amekuwa akifika kutumbuiza.Na wakati wa kampeini za mwaka wa 2007,alikuwa katika msafara uliokuwa ukimpigia debe mbunge wa Kisauni Hassa Joho.”Hata nilipatiwa gari nikawa ninalala nayo nyumbani ili niweze kuwahi katika mikutano hii ya tumbuizo na hili ni jambo ambalo kawme sitahahau.” Akasema.

Vile vile alikuwa miongoni mwa watu waliochangamsha msafara wa naibu waziri mkuu Musali Mudavadi katika uwanja wa Tononoka wakati wa kampeini hizo.”Watu walikuwa wamenyongonyea mkutanoni nami kwa vile nilikuwa karibu nikaomba kipaza sauti na nilipoanza tu kutumbuiza kwa vichekesho vyangu,kila mtu alibaki ameduwaa asijue la kufanya.watu waliburudika.” Akasema.

Kwa sasa anasema usanii huu unaendelea kuwa kwenye damu na anapanga kutafuta wafadhili ili aanze kurekodi video za kazi yake ili auze na kupata mapato.”Unajua kulingana na hali ilivyo,unaweza ukatumbuiza na usibaki na chochote maishani,nia yangu nikutaka kurekodi vichekesho vyangu ili niuze nipate mapato.” Akasema.

Mango Bakari alizaliwa mwaka wa 1972 katika kijiji cha Mukuyu katika sehemu ya Cheranganyi Transnzoia.Alianzia masomo yake katika shule ya maingi ya Mukuyu kabla ya kuelekea katika shule ya upili ya Kitale High.Awali aliwahi kusomea katika eneo la West Pokot lakini akarudi kijijini.Muda huo wote tayari alikuwa akitumbuiza vijijini na sarakasi zake.Ameoa na amejaaliwa watoto watatu,Wasichana wawili na mvulana mmoja.

Mwisho.

Mkulima stadi sana wa kilimo cha mboga katika sehemu ya Vikwathani-Mombasa.

2008-07-04T04:13:00.000-07:00

Mzee Samson Kitony akishuhgulikia shamba lake katika eneo la Vikwathani huko viungani mwa mji wa Mombasa.huyu ni mkulima stadi mno katika kilimo cha kisasa.

SAWASHANGAZA WAKAZI KWA KILIMO CHA KISASA VIKWATHANI

Safari nyangu kuelekea katika kijiji cha Kadzondzo viungani mwa kituo cha biashara cha Mishomoroni,katika eneo bunge la Kisauni ilikuwa na lengo moja tu;kuonana na mkulima ambaye mbinu zake za kisasa za upanzi wa mboga zimekuwa jambo la kushabikiwa kijijini hapa.

Hata hivyo safari yangu kueleka huko haikuwa rahisi na ilihitaji ari ya kutaka kufika huko.Kwanza muindo duni ya barabara iliyochakaa kwa matope ndilo jambo ambalo nilikumbana nalo.Kuna utelezi mwingi na hali ilionekana kunitatiza sana hasa kwa vile kulikuwa kumenyesha alasiri hiyo.Mbali na haya yote,kuna vilima na vijito ambavyo vinahitaji tahadhari kuvipitia.

Na safari yangu ya saa moja unusu ikafikia katika shamba kubwa la Mzee Solomon Simba Kitony,mhandisi mstaafu katika idara ya ujenzi wa barabara huko Kangundo.Na nilipofika kwake,nilikutana na mzee huyo akiwa ndano ya bohari lake ambalo amepanda nyanya ambazo tayari zimeanza kuwa tayari kwa kuvuna.

Awali sikufahamu kule aliko hadi mfanyikazi wake aliponieleza kuwa mzee huyo alikuwa ndani ya bohari hilo la nyanya akikagua mimea hiyo.Nami nikabisha hodi ili kuonana na mzee huyu ambaye majirani wanasema ameleta ina mpya ya ukulima ambao haujawahi kuonekana katika sehemu hii ya Vikwathani na eneo kubwa la pwani kwa ujumla.

Mzee Kitony ameamua kutumia aina ya ukulima ambao unajulikana kwa kimombo kama Greenhouse Farming.Huu ni ukulima ambao unatumika sana katika maeneo ya Naivasha katika ukuzaji wa maua lakini mzee huyu kama alivyoongoea na Taifa Leo,yeye anaamini kuwa hata mimea mingine inaweza kunawiri vyema ikikuzwa ndani ya bohari.

“Wengi walishangaa nilipojenga bohari hii na kuanza kupanda nyanya lakini sasa wamegundia kuwa mbinu hizi pia husaidia mimea mingie wala sio tu maua kama inavyofanyika katika mashamba makubwa yaliyoko Naivasha.

Hivyo kutokana na kilimo hiki,mzee Kitony sasa anatarajia kupata mavuno mema katika msimu huu hasa baada ya nyanya zake kunawiri vyema ndani ya bohari hili.”Kwa kweli sasa ninatarajia kupata mavuno mazuri ingawa hii ndiyo mara yake ya kwanza kulima kwa kutumia ukulima huu.

Hata hivyo lililonishangaza nikuwa mzee Kitony kamwe hajawahiku kuhusika na mausala ya kilimo na kwamba muda wote wa awali aliutumia akiwa katika shuhguli zake za uhandisi katika idara ya ujenzi huko Kangundo.”Mimi kwa kweli awali nilikuwa kijihusisha na masuala ya barabara lakini kadri muda ulivyozidi kuyoyoma,ndipo nikapata ari ya kutaka kufanya kazi za ukulima.” Akamweleza mwandishi wa makala haya katika shamba lake.

Mzee Kitony alifanya kazi na serikali kuanzia mwaka wa 1980 akiwa mhandisi wa barabara hadi alipojiuzulu kazi hiyo mwaka wa 1990 na papo hapo akaanza kuingilia masuala ya ukulima.”Niliamua kuacha kazi ya kuajiriwa ili niendeleze ndoto yangu ya kuwa mkulima na hali hiyo ikajitokeza mwaka wa 1990 nilipoamua kustaafu na kuamua kuingilia kilimo.” Akasema.Hatua ya kwanza ilikuwa ni kuanza shughuli za ukulima katika sehemu ya Kangundo katika wilaya ya Machakos.Mwaka wa 1991 alianza kwa kupanda mboga lakini pia akaamua kukuza maua katika shamba lake mwaka wa 1993.Na ili kukidhi aru yake katikas shughuli hizi,Mzee Kitony alianzisha ufugaji wa kuku mwaka wa 1994,shughuli ambayo iliendelea kumpa pato lake la maisha kabla ya kuingilia ufugaji wa ngombe na kutimiza kabisa ari ya Kitony kuwa mkulima wa kutajika katika sehemu ya Kangundo.

Na ili kukidhi hamu ya wateja wake ambao walikuwa wakifurika kwake wakitaka kuuziwa maziwa,Mzee Kitony aliamua kuanzisha duka la kuuza maziwa katika kituo cha biashara cha Tala katika eneo hilo la Kangundo.”Watu walikuwa wamejua kuwa ukifika kwangu utapata maziwa na nilikuwa na idadi kubwa ya wateja na hapo ndipo nikaamua kufungua duka katika kituo cha biashara cha Tala katika eneo la Kangundo ili kuwahudumia wakazi wa huko,na kweli biashara ilizidi kunawiri..” akasema kwenye mahojiano na Taifa Leo.

Hata hivyo baada ya miaka mingi ya kuishi na kutoa huduma zake katika sehemu ya Tala,huko Kangundo,mzee Kitony aliamua sasa ateremke pwani na kuendeleza kilimo hiki.Na safari yake ya mwaka jana ikamfikisha katika sehemu hii ya Kadzondzo ambayo inapakana kwa karibu na mtaa maarufu wa Vikwathani.

Sio wengi waliogundua kuwa mzee huyu ni mkulima wa kisasa hadi alipoamua kustwasha eneo la shamba alilopta karibu na kilima katika sehemu hii.”Nilipofika hapa mwaka jana niligundua kuwa eneo hili lina rotuba tele lakini wenyeji wanaamua kukuza tu mahindi pekee badala ya kuzingatia kilimo cha mboga na matunda,na hapo ndipo nikaamua kuanza kukuza mboga hizi.” Akasema akimuonyesha mwandishi huyu sehemu kubwa ambayo amepanda sukuma,biringanya na takribani kila aina ya mboga.

Na ili kufanikisha zoezi zima la kukuza kilimo hiki,Mzee Kitony aliamua pia kuchimba kisima ambapo yeye huchota maji na kunyunyizia shamba lake.Na ndani ya bohari maalum ambalo anakuzia nyanya zake,ameweka mifrereji ambayo hupiga maji moja kwa moja kutoka ndani ya kisima.

Pia Mzee Kitony ameajiri vijana wawili ambao wanamfanyia kazi ili kuhakikisha kuwa kilimo chake hiki kinanawiri vyema na kumletea faida.anataraji hivi karibuni kuvuna nyanya zake na kuzipeleka sokoni ambao atapata bei nzuri.Alisema kuwa kwa ssa nyanyna ni mojawapo ya mboga ambazo zinaleta faidi nzuri mno.

Alisema mpango huu wa kupanda na kukuza mboga ndani ya bohari unasaidia mimea kukwepa wadudu waharibifu ambao hupatikana hewani bila kuonekana.

Aliongeza kuwa katika mkoa huu wa pwani,magonjwa ya hewa ambayo huumiza mimea imezagaa hasa kulingana na hali ya anga ambayo ni ya joto na hivyo akasema ipo haja kwa wakazi wa sehemu hizi kujaribu mbinu kama hizi za kilimo ambazo mwishowe zitawafaidi.”Kwa sasa ni wazi majaribio yangu ya kutumia aina hii ya kilimo ina afyeni kwani tayari nyanyna zimeiva vizuri na hivi karibuni nitazipeleka sokoni ili ziuzwe nipate riziki.” Akasema.

Na baadhi ya wakazi wa Kadzondzo ambao Taifa Leo iliongea nao walifurahia juhudi za Mzee Kitony ambaye sasa ukulima wake na mbinu hizi ni gumzo kila mtaa unaoenda.”Kweli tunaona huyu mwenztu amejiri na mbinu bora za kilimo ambacho kikifuatuliwa vyema basi kinaweza kutufaidi hasa katika eneo hili ambalo limejaa rotuba.” Akasema Mzee Peter ambaye ameishi katika sehemu hii kwa muda mrefu.

Hadi nikiondoka katika shamba la mzee Kitony,nilikuwa nikijivunia juhud ihizi kubwa za mkulima huyu ambaye anasema haoni chochote cha kumsimamisha hadi ndoto yake ya kuwa mkulima mtajika itimie.

Mwisho.

Juhudi za kuboresha utalii wa kinyumbani hapa Kenya(Domestic Tourism)

2008-07-04T04:11:00.001-07:00

Wakazi hawa wa jiji la Mombasa juzi walikuwa na kivutio cha aina yake pale kituo kimoja cha utangazaji kilipoandaa tamasha la kukata na shoka ambapo wasanii mbalimbali walitumbuiza.mambo kama haya yanweza kuwa kivutio kikuu cha watalii humu nchini.

UTALII WA NYUMBANI SASA NI KIVUTIO KIKUBWA NCHINI

Utalii wa kinyumbani au kwa kimombo Domestic Tourism ulikuwa ukipuuzwa na wakenya wengi miaka ya nyuma lakini sasa unaendelea kupata umaarufu mkubwa miongoni mwa wakenya.

Nyakati ambako hoteli nyingi zilizoko mwambaoni zilitawalwa na wazungu kutoka mataifa ya Ulaya ikwemo Marekani na Uropa sasa zinaelekea kuisha na badala yake wakenya wenyewe sasa wameamua kuitalii nchi yao ambayo ni bayana imejaaliwa kuwa na mandhari ya kuvutia katika kila pembe.

Kwa mfano katika mkoa wa pwani,kuna mahoteli na fuo za kuvutia ambapo kuanzia Kusini hadi kaskazini,utapata kuna haoteli nyingi ambazo sasa zinatembelewa na wakenya wengi wanaotaka kujivinjari katika mandhari haya.

Na katika enzi hizi ambapo mataifa ya kigeni yakiongozwa na Marekani yamekuwa yakiwekea vikwazo raia wao wasifike nchini,basi imekuwa ni fursa kwa wakenya wenyewe kujivinjari na kuburudika katika fuo hizi za pwani,au kutembelea mbuga za wanyama zilizoko maeneo ya bonde la Ufa au hata vyenzo vingine vya kitalii vinavvyopatikana katika mikoa ya Nyanza na Magharibi.

Ni bayana kuwa mpango huu wa utalii wa nyumbani unapigiwa debe hata na wizara ya utalii ambayo mara kwa mara imekuwa ikiwahimiza wakenya kutalii na kulifahamu vyema taifa lao.

Kutokana na mwito huu mahoteli yamekuwa yakipunguza bei za huduma zao hasa nyakati za watalii wachache na kuwapa wakenya muda mwafaka wa kukodi katika hoteli hizi na kujionea wenyewe mandhari ambayo yanawavutia watalii kutoka Ulaya na Marekani.

Sio hayo tu bali hata ada ya kuingia katika mbuga za wanyama zimekuwa zikipunguzwa katima nyakati fulani ili kuweza kuwapa wakenya muda mwafaka wa kuvinjari na kujionea mandhari ya kuvutia hasa wanyama.

Kulingana na mtandao wa http://www.tembeakenya.co.ke/ ,wizara ya utalii inapanga kuwekeza zaidi katika sekata ya utalii wa nyumbani na kuleta mwamko mpya ya kufufua sekta hii baada ya kuvurugwa awali kutokana na tatizo la ghasia za baada ya uchaguzi.

Kulingana na tovuti hiyo,katibu katika wizara hiyo,Rebecca Nabutola,alisema majuzi kuwa serikali inapanga kuongeza mtaji wake katika sekta ya utalii wa nyumbani kwa kiwango cha asilimia mia moja kama mojwapo ya juhudi za kuweza kuona kuwa sekta hii ya utalii wa kinyumbani inanawiri vyema.

Hali hii inatarajiwa kuwapa matumaini wakenya wengi ambao wamejikuta wakikosa kupata nafasi ya kuvinjari katika mandhari yao ya taifa hili kutokana na gharama kubwa ya kulipia huduma hizi.

Akiongea na Taifa Leo katika ufuo wa bahari wa Pirates,Gabriel Njuguna ambaye ni mkazi wa jijini Nairobi lakini ambaye kwa sasa anajipumzisha katika hoteli moja ufuoni alisema na kukaribisha mwito huo huku akisema utalii wa nyumbani unafaa kulindwa na kuimarishwa zaidi ili wakenya waweze kuingia na vile vile kujumuika katika mikahawa na hoteli za kitalii kwa bei nafuu.

Kuhusu mpango wa wizara ya utalii kuboresha kuwekeza kwa asilimia katika mpango huu wa utalii wa kinyumbani,Njuguna alisema kuwa hilo ni wazo zuri na linalenga kuwapa wakenya ambao wanataka kuingia katika mbunga za wanyama au katika hoteli za kitalii afueni.

Hata hivyo aliitaka wizara ya utalii kusambaza ujumbe wake bayana katika warsha na mikutano mbalimbali katika ngazi za wilaya ili wakenya wengi wapate habari hizi na matukio ya kila siku kuhusu huduma hizi.

”Ingelikuwa bora ikiwa wizara ya utalii itafanya juhudi kubwa za kutangaza utalii wa kinyumbani sio tu katika mikahawa ya kifahari jijini Nairobi bali hata katika ngazi za wilaya ambapo wakenya watajua kile kinachoendelea.” Akasema mfanyibiashara huyo kutoka Nairobi.

Kulingana na wizara ya utalii,baadhi ya huduma ambazo zinalinganishwa na utalii wa nyumbani ni kama vile kuchukua familia na kwenda kujivinjari wakati wa mapumziko,kwenda katika mapumziko ya wikiendi na huduma nyeninge.Haya ni mambo ambayo kimsingi yanafurahisha na ipo haja ya kila mmoja kujitoa mhanga kuhakikisha yana faulu.

Na jiji la Mombasa,utalii huu wa nyumbani sasa umekuwa ukichangamkiwa si haba.Kila inapofika wikiendi,wakazi wa jiji hili huamua kutoka nje ya jiji na kupiga kambi katika ufuo wa bahari wa Pirates/Jomo Kenyatta ambapo hujivinjari huku wakipata upepo mwanana kutoka baharini.

Wengine huamua kufika hapa wakiwa na familia zao na kupanda ngamia,huku wengine wakiogelea na kupanda motaboti za kwenda mbio baharini.Salome Mwikali ni mmoja wa wakazi ambaye awali alikuwa akifanya kazi Nairobi lakini akahamishiwa na kampuni yao hadi eneo hili ambako sasa anafanyia kazi.

Aliniambia kuwa yeye mara kwa mara hufika ufuoni hapa akitalii na wanawe wawili pamoja na bwanake ambaye husaifiri na kuja Mombasa kila wikiendi.”Mimi nikiwa na mzee kila wikiendi hufika hapa kutalii huku watoto wangu wakipanda ngamia na kwenda kujifurahisha.

Bila shaka haya ni mambo ambayo yanavutia na endapo serikali itafanya juhudi kubwa kwa hili,basi tuna matumaini kuwa hata ada ya kulala hoteli hizi za kitalii pia zitapungua na kutupa nasi mwanya wa kuzifikia.” Akasema.

Hivi majuzi akiwa nchini Ujerumani,waziri wa Utalii Bw.Najib Balala aliwahakikishia wageni kuwa taifa la Kenya sasa ni shwari na kwamba lipo njiani ya kuweka mikakati bora kuhakikisha watalii wanaofika Kenya wanapata mandhari ya kuvutia.Juhudi hizi ni kampeini tosha lakini iwapo wageni hawa wanakuwa na tashwishi ya kurudi nchini,ni bayana ipo haja kubwa ya watalii wa humu nchini kuvinjari taifa lao.

Kulingana na mkurugenzi wa bodi ya utalii nchini Dkt.Ongonga Ochieng,utalii humu nchini ulipata pigo baada ya ghasia za baada ya uchaguzi hivi kwamba kunahitajika juhudi kubwa za kuukuza.Katika mazingira ya kawaida,mkurugungezi huyo alisema kuwa Kenya hupata kitita cha Sh.Biliioni moja kutokana na utalii,jambo ambalo linaifanya sekta hii kuwa mojawapo ya sekta ambazo zinahitaji kushuhgulikiwa kwa kina kila inapokumbwa na shida.

Mwenyekiti wa baraza jipya la utalii wa nyumbani(New Domestic Tourism Council Of Kenya) Bi Anastazia Wakesho majuzi alinukuliwa na vyombo vya habari akisema kuwa baraza lake sasa linajitahidi kuona jinsi utalii wa nyumbani utakavyotumiwa kukuza uchumi wa taifa hili baada ya ghasia za baada ya uchaguzi ambazo ziliwafanya watalii wengi wasifike nchini katima msimu wa mapema mwaka huu.

Baraza hili lenye wanachama 27 lina mipango ambako linatarajia kuongeza kiwango cha utalii wa nyumbani kukidhi na kuafikiana na ule wa nje ili kukabiliana na visa ambapo taifa hili huwa taaban wakati mataifa ya nje yanapokataza raia wao kufika nchini kutokana na sababu moja au nyengine.

Mwaka wa 2006,bodi ya utalii nchini ilirekodi kiwango kikubwa cha mapato kutoka kwa kitengo hiki cha utalii wa nyumbani ambapo kati ya Sh.60.Bilioni ambazo sekta hiyo ya utalii ilipata,Sh.18 Billioni zilitokana na soko la utalii wa nyumbani.

Kutokana na sababu hii wakenya wanamini kuwa sasa utali wa nyumbani ndio jambo ambalo limebaki kwa wizara ya utalii kulipa kipeumbe na kwa ushirikiano na washika dau wengine,wanatumai hali itaimarika katika siku zijazo.

Mwisho.

Je muziki wa kizazi kipya utaendelea pwani?

2008-07-01T22:05:00.000-07:00

Picha hizi zote zinaonyesha jinsi mambo yalivyokuwa na juhudi za kukuza muziki wa kizazi kipya hapa Mombasa.

Msanii nyota ndogo na Ally B pia ni maarufu mno kwa uchezaji wa muziki wa kizazi kipya.

WIMBI LA MUZIKI WA KIZAZI KIPYA SASA LAWIKA PWANI

Baada ya muziki wa taarab kuvuma pwani ya Kenya kwa miaka na vikaka,sasa ni dhahiri muda huo umekwisha pwani hii na sasa muziki wa kizazi kipya ndio unaoelekea kutawala katika vilabu na maeneo yote ya burudani.

Ingawa hili linaonekana kuwa jambo geni kwa wazee wa makamu na wale ambao walitazamia muziki wa taarab kuendelea kupata wapenzi wengi kadri miaka ilivyokuwa ikienda,vijana wa kisasa ambao yamkini wanajiita wale wa kizazi kipya wanaendelea kuienzi miziki hii ya kileo na kuipa kwaheri ya kuonana miziki ya taarab.

Kawaida miaka ya sabini na kuendelea hadi miaka ya tisini,hakuna hafla yoyote pwani ambayo ingelifanyika bila kuwepo kwa miziki ya taarab ili kuwaburidisha adnasi kwenye hafla hizo.Lakini leo hii ni bayana kuwa vijana wengi hawana tena musa au hawafahamu tena kuhusu miziki hii na badala yake wanaendeleza miziki ya kizazi kipya.

Miziki hii ni ile ya kufokafoka au maarufu kama Hip-Hop,Salsa,R&B,Genge,Kapuka na Rap.Kwa hilo sasa miziki ya taarab haina afyeni ya kuweza kupenya katika soka la vijana ambao ni idadi kubwa kila wanapovinjari na kujituliza.

Na ili kuonyesha kuwa miziki ya kizazi kipya sasa imegeuka kuwa wimbo jipya la kiburudisho katika mwambao wa pwani,maelfu ya mashabiki walifika hivi majuzi katika ukumbi wa wazi wa Ufuoni katika sehemu ya Jomo Kenyatta kwa onyesho maalum la Famili Fun Show ambalo lilikuwa limeandaliwa na kituo cha Pwani FM pamoja na kampuni ya Kaluworks.

Zaidi ya mashabiki 5,000 walihudhuria tamasha hilo na ilionekana bayana jinsi wanavyoendelea kuufurahia muziki huu ambao kwa sasa umefunika kila aina ya burudani hapa pwani.Na wasanii wengi ili kukidhi mahitaji ya idadi kubwa ya mashabiki wao ambao inaongezeka kila uchao.Jukwaani kulikuwa na zaidi ya wasanii 40 ambao walitoka pembe mbalimbali za mkoa wa pwani kuja na kutumbuiza hapa ufuoni.Kwa mara ya kwanza mashabiki wa miziki hii ya kizazi kipya walijumuika na wasanii ambao yamkini wamekuwa wakiwaona tu katika runinga na kusikia miziki yao katika vituo vya FM ambavyo vimeamua kuwakuza kwa kuwachezea miziki yao kila siku.

Na ili kuzidi kuwainua,vituo vingi hapa pwani navyo vimechukua mkondo mwengine.Awali burudani kubwa ambalo lilikuwa likitawalwa na miziki ya taarab sasa linaendelea kuisha makali huku sasa vipindi kuhusu miziki ya kizazi kipya ikiendelea kunawiri na kuanzishwa katika stesheni za pwani na taifa lote kwa jumla.

Kulingana na DJ maarufu wa Mombasa,Peter Adams ambaye anasimamia kampuni ya Fingerworks DJ na vile vile mtangazaji wa kipindi cha Tafrija kipwani katika stesheni ya Pwani FM,nia hapa ni kujaribu kuwakuza wasanii wa miziki ya kizazi kipya ili nao waweze kujikimu kimaisha kupitia miziki yao.Kwenye mahojiano kadhaa ambayo amekuwa akiyafanya na wanamiziki hawa katika kipindi hiki,DJ huyu anasema kuwa hata hivyo ni sharti kwa wanamiziki hawa wa kizazi kipya wajenge vyanzo vyema na kukita miziki yao katika hatua kubwa ili kuwa na malengo makubwa ya kudumu kama kazi.

”Kimsingi ni kujaribu kuandika mashairi ambayo yatawafaa watu katika maisha yao mbali na burudani,”alisema hivi majuzi akizungumza na wasanii kutoka studio ya kutayarisha muziki ya Greenhouse Records iliyoko Mtopanga.

Vile vile mtangazaji mwengine hapa pwani Bw.Donde Samora pia amekuwa akiandaa kipindi mshindi wa pwani ambapo hupata fursa ya kuhojiana na baadhi ya wasanii wa nyimbo hizi za kizazi kipya na kuona jinsi wanavyoweza kuwafaidi mashabiki wao na vile wao pia kujiendeleza kimaisha kupitia kwa muziki.

Na kutokana na chimbuko hili la miziki hii,basi pia kumekuwa na ongezeko la studio ambazo zinawarekodi wasanii hawa na kuunda midundo ambayo inapokelewa vyema na mashabiki wao;wengi wao wakiwa ni vijana chipukizi.

Baadhi ya studio ambazo sasa zimeanza kujulikana sana ni kama vile Jungle Masters Records ambayo inamilikiwa na msanii maarufu wa Mombasa Prince Adio.Adio aliwahi kuvuma sana kwa kibao chake cha Nikiwa ndani wapiga kelele.Kibao hiki ambacho alikirekodi katika studio ya Tabasam Records kilivuma kama moto jangwani na kwa sasa ameamua kuanzisha studio yake ya Jungle Masters.Ni mmoja wa watayarishaji wa miziki ambao walikuwa katika ufuo huo wa Pirates juzi kuonana ana kwa ana na mashabiki wao na kusikia moja kwa moja jinsi wanavyoenzi miziki yao.

Studio nyengine ambayo pia inajulikana kwa mashabiki wengi ni ile ya Greenhouse Records.Ni studio hii ambayo imewakuza wasanii maarufu wa Mombasa kama vile Nyota Ndgo na Susumila.Nyota ndogo alianzia katika studio hii na kwa sasa amerudi tena katika studio hii akifanya kazi na baadhi ya wasanii ambao alianza nao akiwa hapa.Studio nyengine ambayo kwa sasa imeingiza jinale katika baadhi ya studio zenya mvuto katika mwambao huu ni ile ya Flash Records ambayo ilijulikana baada ya kurekodi kibao cha Kadzo Wangu ambacho kiliimbwa na Ally B.

Studio za zama ambazo bado zinajitahidi kukabiliana na ushindani ni kama vile Tabasamu,Ufuoni,Jikoni na Kelele Records.Pia kuna studio ambazo zinaendelea kuchipuka huku zikiwania soko la muziki huu wa kizazi kipya ambalo ni dhahiri kwa sasa linapanuka pwani.Baadhi ya studio hizi ni kama vile South West Records,Crystal Records,G-Records na G.Stone Records.

Nao wasanii ambao wanaendelea kuvumisha jamvi la muziki huu na kuwafanya mashabiki wao kutoenda kwa muziki wowote mwengine ule ni wengi na walionekana juzi jinsi walivyokuwa wakiwashangilia wasanii hao kila tu walipotaka kuiingia jukwaani kutumbuiza.Baadhi ya wasanii hao ni kama vile Susumila,Escoba,Tasha Family,Mbichwa Family,RP Kelly,na Ruff G ambaye wimbo wake Naja mimi bado unaendelea kushika nambari nzuri katika chati ya pwani.

Na nje ya Mombasa pia kuna wasanii wengi ambao hutetemesha jukwaa kila wanapoingia jukwaani kutumbuiza.Hii ilidhihrika wakati msanii Double S alivyofanya ukumbi wote kupulika kwa kutaka kumuona jinsi alivyokuwa akikatika jukwaani na wimbo wake ukitikisha anga za ufuoni kutokana upigaji mzuri.Kwa dakika tatu ambazo msanii huyu alikuwa akitumbuiza jukwani.Pia msanii Dady S ambaye hurekodia muziki wake katika Studio ya Jungle Masters pia aliwafurahisha mashabiki wake.

Baadhi ya mashabiki ambao Taifa Leo ilizungumza nao walisema wao sasa wameamua kusikiliza miziki ya kizaiz kipya kwa vile hata ujumbe unaotolewa katima nyimbo hizi unahusu maisha ambayo wanaishi kwa sasa.Zile nyakati ambapo vijana tulinyimwa aina ya matumbuizo na kuwaangaliwa wazee pekee wakijifurahisha sasa hamna tena na niwakati wa vijana wenzetu kuongonzana na yote haya ni kupitia nyimbo hizi ambazo tunaimba.” Akasema msanii Susumila.

Kulingana na Jane Akinyi yeye hufurahia muziki wa kizazi kipya si zaidi ila kwa mapigo yake na sauti nyororo za waimbaji chipukizi anaowasikia.”Mimi hufurahia muziki wa kiazi kipya kwa sababu hata magoma yake yamepigwa vizuri tena wasanii wenyewe hata ukiwaona kwenye video wamevaa vizuri na kupendeza,hizi ni nyakati zetu sisi vijana nasi tufurahie.” Akasema.

Naye John Kamau ambaye Taifa Leo ilimpata akijivinjari ufuoni huku akisikiliza kwa makini wasanii wakilishambulia jukwaa alikiri kuwa sasa muziki wa kizazi kipya pwani umeimarika na bado tu mambo kidogo ambayo wasanii hawa wanatakikana kufanya kufikia wenzao wengine wa kitaifa na kimataifa.”Mambo niliyoyaona hapa ni dhahiri kuwa muziki huu wa kizazi kipya hapa mwambaoni umfika mbali na wasanii wana ari ya kujiendeleza kimuziki;hata hivyo ni udhamini tu ndio unaoweza kuwafanya vijana hawa wakapiga hatu kubwa maishani kupitia miziki hii ya kizazi kipya.” Akasema Kamau.

NYOTA NDOGO NA ALLY B WALIVYOCHANGAMSHA UMATI UFUONI

Na KAZUNGU SAMUEL

Kuna msemo usemao kuwa mfalme hatambuliwi kwao.Lakini msemo huu ulikuwa kinyume kwa yeyote ambaye alifika katika tamasha la familia pwani kujionea jinsi wasanii wenye majina makubwa hapa pwani walivyotetemesha jukwaa.

Msanii Nyota Ndogo ambaye anafahamika kote nchini na Ulaya kwa uimbaji wake mwororo na sauti ya ninga alikuwa kivutio cha pekee baada ya msimamizi wa jukwaa hilo Donde Samore kumuita jukwaani kutumbuiza.Pindi tu ilipotangazwa kuwa msanii huyo alikuwa akitaka kuingia jukwaani kutumbuiza,mashabiki wote wakaanza kusukumana kila mtu akitaka kumuona mwanadada huyo ambaye amejaaliwa kipawa kipana cha kuimba.Ilibidi maafisa wa ulinzi kuwa makini na kuzuia baadhi ya mashabiki ambao walisukumana kila mtu akitaka kumshika mkono tu wa Noyta Ndogo.

Naye hakuwavunja moyo kwani kibao chake cha kwanza ulikuwa ni wimbo maarufu sana kote nchini; Ukizaa mwana Shukuru,ukikosa usikufuru.wimbo huu ni miongoni mwa nyimbo ambazo zilimpaisha mno nyota ndogo na kumfikisha pale alipo leo hii.Huku akisaidiwa na bendi ya Love Band,msanii huyu ambaye wengi wanaamini amefaulu kabisa katika miziki hii hapa pwani hakuwavunja moyo bali aliwapa kitu cha uhakika na hivyo basi mashabiki wakakataa aondoke jukwaani.

Baada ya wao kuzidi kukatalia msanii huyu asiondoke,ilibidi nyota ndogo kuwaongezea wimbo kuna watu na viatu.Huu ni wimbo ambao wadau wa miziki na hata vyombo vya habari vimekuwa vikiutaja kama wimbo ambao unaelezea hisia halisi za maisha ya msanii huyu.Na alipomalizia wimbo huu mashabiki wakadinda na kumlazimu msanii huyu kuimba wimbo mpya wa Moto ambao pia kwa sasa upo juu.

Na huku jioni ikiendelea kukaribia,umati uliokuwa hapo ulijipata katika burudani la aina yake baada ya msanii AllyB ambaye anafahmika mno kwa kibao Kadzo wangu alipoalikwa jukwaani kutumbuiza.Hapo msanii huyu alilakikwa na mashabiki huku wengi wao wakiparamia jukwaa na kutaka kumgusa.Ilibidi walinzi katika jukwaa hili kuwazuia na kweli Ally B hakuwavunja moyo kwani aliwaimbia wimbo wake maarufu wa Soldier.Hata hivyo licha ya mashabiki kulilia zaidi,ilibidi AllyB kuondoka jukwaani baada ya kudhihirika kuwa kulikuwa na muda mchache uliobakia.

WAKATAJI VIUNO NAO WALIGEUZA UFUONI KUWA RAHA TELE

Na KAZUNGU SAMUEL

Sio wengi ambao wamewahi kuwqa karibu na wakataji viuno ila tu kuwaona katika runinga au katika picha za video wakifanya kazi yao ya kunengua.Lakini mambo hayakuwa hivyo katika ufuo huu wa Jomo Kenyata huko Bamburi kwani akina dada wa vikundi mbali mbali walijitokeza ukumbini kunengulia baadhi ya waimbaji wa nyimbo za kizazi kipya.

Kuwepo kwa akina dada hawa jukwaani kulionekana kuwa kivutio cha aina yake kwani mashabiki walifurika wakitaka kuwaona jinsi wanavoykata viuno na kuwaacha wengi wao wakiwa hoi huku wakiwataka kutoondoka jukwaani.

Kikundi cha Susumila pia kilikuwa na wanenguaji ambao waliwaacha wengi wakiwa hoi huku mashabiki wakitaka akina dada hao waendelea kuwachezea jukwaani.Lakini ni kikundi hiki cha coastal Dancers ambacho kilionekana kuwavutia wengi kutokana na jinsi kilivyoweza kunengeua kwa ustadi na kuufanya ukumbi kulipuka kwa furaha kuu.

Na kulikuwa na mrembo mmoja ambaye aliamua kujitokeza jukwaani na kunengua katika miondoko ambayo iliwaacha jamaa wakiwa hawana la kusema.Hata hivyo baadhi yao ingawa walikuwa wakifurahishwa na jinsi warembo hao walivyo kuwa wakinengua, lakini baadhi yao walikuwa wamevaa mavazo ya kutatanisha kweli.

Hata hivyo kulingana na Asha Dorothy ambaye pia ni mnenguaji katika ufuo huu,yeye hurufahia kunengua kwa kuvaa nguo hizi fupi kwa vile ndizo zinazotoa mwanya wa mwili kufanya kazi yake.”Hutakikani ucheze huku ukiwa umevaa nguo ambayo inakatiza miondoko yako,ni lazima uvae ile kitu ambayo itakufanya ucheze kwa uzuri zaidi na kupagawisha mashabiki wako.” Akasema msanii huyo.

Baadhi ya waremo mashabiki walisema wao wanafurahia wakataji viuno hao kutokana na kuonyesha kuwa hata wanawake au wasichana wanaweza kunengua na kupata ajira hapa pwani.

”Hii ni kazi na katika kazi yoyote ni lazima ujitume,hakuna litakalokuja kirahisi katika kazi yoyote na ndio unaona ni lazima wasichana hawa wavae hivi ili kurahisisha uchezaji huu.” Akasema Pili Juma ambaye alikuwa miongoni mwa wakazi wa pwani waliofika katika ukumbi huu kutazama au kujiburudisha na tamasha hili.

DARUBINI.

LICHA YA KUJITAHIDI WASANII WENGI HUKOSA UDHAMINI NA KUACHA KUIMBA.

Na KAZUNGU SAMUEL

Licha ya wasanii hapa pwani kujitokeza na kukuza muziki huu wa kizazi kipya,kuna hatari kubwa ya wasanii wengi kupotea na kutosikika tena kwa kukosa udhamini.Mbali na tamasha kama hili ambalo hutokea tu katika majira Fulani,wasanii waimbaji wengi hubaki bila mauzo ya nyimbo zao au chochote cha kujivunia baada ya kukosa udhamini na baada ya muda hukosa kusikika tena.

Baadhi ya wasanii ambao waliongea na Taifa Leo baada ya hafla hii walitaka serikali ifanye juhudi kubwa kuhakikisha kuwa sanaa hii inapalilizwa na kuwa jambo la kujivunia kote nchini.

Wengi walisikitika kuwa baada ya maisha yao katika muziki wakitumbuiza,yamkini hawana ufahamu wa jinsi maisha yao ya mbeleni yatakavyokuwa baada ya kuacha muziki.Na jambo hili walisema husababishwa na kukosa wadhamini ambao wanaweza kupalilia vipaji vyao kwa kuwatafutia soko miziki yao.Mbali na hayo ulegevu wa serikali katika kuhakikisha kuwa kazi hii ya sanaa inatokea kuwa na mapato kwa wanaoifanya pia ni suala nyeti ambalo litanaa kuangaliwa vyema.

”Tunatumbuiza hapa leo na kujivunia mashabiki lakini huwezi kujua baada ya miaka tano utakuwa wapi ikiwa muziki wako hauna mtu wa kukisimamia.” Akasema Escoba.Akiongea Taifa Leo,msanii huyu ambaye alikuwa akiimba na Susumila kabla ya kuachana na kiloa mtu kushika njia yake anasema kuwa udhamini katika muziki ni jambo muhimu ambalo pindi tu lipopuuzwa basi ni sawa na kumtayarishia msanii kaburi lake kimuziki.

Akiongea katika kituo kimoja cha FM hapa pwani,msanii Amani Mele kutoka Malindi na ambaye ana kikundi kiitwacho Snow Family alilalamika kuwa kuna alama tatu za P ambazo zinaposhirikiana vyema msanii anaweza kupiga hatua.Alisema alama hizo ni P ya kwanza ambayo inamaanisha Produsa wa muziki,P ya pili ikiamanisha Presenta(Mtangazaji) na P ya mwisho akiamanisha Promota.”Hawa ni watu watatu muhimu ambao pindi wanapokuwa na ushirikiano mwanana basi wanaweza kupiga kumfanya msanii kupiga hatua kubwa kimaisha kupitia muziki.” Akasema msanii huyo ambaye pia alikuwa ameandamana na mtayarishaji muziki George Okoiti wa G-Stone Records.

Naye msanii Cool Haroun ambaye alivuma na wimbo Machizi akiwa Mombasa kabla ya kuhamia Malindi anakiri kuwa wasanii wengi humu nchini na hasa katika mkoa wa pwani wanakumba na changamoto kubwa kutokana na jinsi hali ilivyo.

Katika taifa la Tanzania,wasanii wengi wanaaminika kupiga hatua baada ya kupata usaidizi kutoka idara Fulani za serikali mbali na kuwa na mapromota wa miziki ambao wamejitoa mhanga kabisa.

Katika Tanzania kuna Baraza La Sanaa Tanzania(BASATA) ambalo nia yake kuu ni kuinua vipaji vya wasanii wa nchini mwao.Na licha ya BASATA kuwa shirika ambalo linapata usaidizi wa kifedha kutoka kwa serikali,baadhi ya wanaolisimamia ni washika dau wenyewe katika sekta ya sanaa nchini Tanzania.Humu nchini bado hakujakuwa na juhudi kubwa za kuwainua wasanii na wengi wao hujibidisha kwa juhudi zao wenyewe ila hufeli kwa kukosa kupata udhamini.

Mwisho.

Tamko la wapwani kutosoma lachemsha watu wa pwani:

2007-10-17T05:18:00.000-07:00

Tamko la katibu katika wizara ya ardhi Kombo Mwero kuwa watu wa pwani hawawezi kupata nyadhifa kuu katika afisi za serikali kwa vile hawana elimu limewakasirisha mno wasomi wa mkoa huu ambao sasa wanamtaka katibu huyo aombe msamaha.Katibu Mwero akiongoea katika ukumbi wa mkuu wa mkoa wa pwani wakati wa kongamano la ustawi kufikia mwaka wa 2030,alidai wakazi wa mkoa wa pwani hawajaweza kuajiriwa kazi kubwa kwa kukosa elimu.

Hata hivyo Sheikh mmoja ambaye alisomea sana mambo ya baharini aliinuka na kumkashifu katibu huyo kwa ujeuri huo huku akisema kuwa licha ya yeye kusoma sana,bado hajapata kazi katika shirika kubwa kama vile KPA.

Sasa maoni kwenu watu wa pwani,je? katibu huyu alikuwa na maana gani aliposema watu wa pwani hawakusoma.

Tafadhali leteni mchango wenu katika blog hii ili tuendeleleze hoja hii.

Kazungu Samuel

JIJI LA MOMBASA SASA LINAMETAMETA

2007-09-25T04:33:00.000-07:00

Kwa hakika sasa kila yule anayeingia jijini Mombasa atakubaliana nami kuwa jiji hili sasa linametameta baada ya miundo mbinu ambayo ilikuwa ikitishia jiji hili kuimairshwa maradufu.Baadhi ya mambo ambayo yalikuwa kilio cha wakazi wengi jijini hapa sasa kimesikika.Kwa mfano mataa katika daraja la Nyali hadi katikati mwa jiji sasa yanawaka usiku wote.Hali hii imewaepushia wale ambao walizoea kupigwa tero na vibaki na mikora katika daraja hili la Nyali.Kama daraja ambalo linaunganisha jiji la Mombasa na mitaa ya kasikazini kama Bamburi,Kongowea,Mishomoroni na Kisauni,huwa na wakazi wengi hadi usiku.Na kwa sababu hakukuwa na mataa,wezi walitumia udhaifu huo kuwanyanyasa kabisa wapita njia.Angalau sasa baraza la jiji limefanya kazi nzuri.Nasema ahsanteeni tena sana.

Harakati za baraza la jiji la Mombasa kulisafisha jiji.

2007-07-23T04:46:00.000-07:00

Nimevutiwa mno na juhudi zilizoanzishwa na diwani wa wodi ya Kingorani hapa jijini ambaye ni mwenyekiti wa kamati ya mazingira Bw.Said Mathias ambaye ameamua liwe liwalo jiji hili litakuwa safi.

Kwa hakika juhudi hizi zimekuwa zikivutia mno binafsi hasa baada ya miaka mingi ya uvunjaji wa sheria za usafi ambazo zilikuwa zimeleta doa katika juhudi za baraza la jiji hili kuendesha usafi.Kulingana na diwani Mathias,sasa ni marufuku kuvuta sigara ovyo mbali na kumwaga taka katika maeneo ambayo hayajaruhusiwa na baraza.

Juhudi hizi zinafaa kuigwa na kupongezwa na kila mkaazi wa jiji hili la Mombasa.